"ساقاۋ" پارلامەنت "ماقاۋ" پارلامەنتكە اينالىپ كەتپەي مە؟

3739
Adyrna.kz Telegram

قر پرەزيدەنتى ق.ك.توقاەۆقا!

اسا مارتەبەلى قاسىمجومارت كەمەلۇلى!

اي، كۇننىڭ امانىندا شىققىر كوزىم نە كورىپ وتىرسىڭ؟! تاۋەلسىز 30 جىلدا انا ءتىلىمىزدى - مەملەكەتتىك ءتىلىمىزدى ارداقتاۋدان جەتكەن جەرىمىز وسى بولعانى ما؟! جاڭا سايلاۋدان كۇتكەنىمىز وسى ما ەدى؟!

بۇگىن قاستەرلى انت بەرۋ راسىمىندە ءتىلىن شايناپ تۇرعان دەپۋتاتتار كۇنى ەرتەڭ ءتىل ارقىلى جۇرەككە ورنىعار ءدىلىمىزدىڭ دال-دۇلىن شىعارىپ، شايناپ تاستارىنا ءتىپتى دە كۇمان قالماي وتىر! ءتىلدى بىلمەگەن دەپۋتات حالقىمىزدىڭ مۇددەسىنە ورايلاسار ءجىبى ءتۇزۋ وركەنيەتتى زاڭ قابىلداي قويادى ما؟

ءسىز باستاعان رەفورماعا مىنا ءتىلىن شايناعان دەپۋتاتتار ىلەسە الا ما؟ رەفورما - جاڭالىق! جاڭالىقتى قابىلداۋ، قولداۋ ءۇشىن تىڭ تانىم، سارا سانا، سونى سەرپىن كەرەك. ساقاۋ دەپۋتاتتار بويىنان ءسىز باستاعان رەفورمانى ءتۇسىنىپ، ءتۇيسىنىپ، قادىرىنە جەتىپ قولدايتىن قاسيەت تابىلا ما؟

دەپۋتاتتار ساقاۋ! دەمەك، پارلامەنت ساقاۋ! ساقاۋ پارلامەنت بۇل كۇيىندە مارعاۋ زاڭ قابىلداپ، ماقاۋ پارلامەنتكە اينالىپ كەتپەس پە؟! ەندى نە شارا؟

پارلامەنتتى تاراتۋ قۇزىرىڭىزدا! بىراق، وبال شىعار! حالىق جەكە دەپۋتاتقا ەمەس، پارتياعا داۋىس بەردى. ولاي بولسا پارتيالار ساقاۋ دەپۋتاتتاردىڭ مانداتىن قايتارىپ السىن! ورنىنا مەملەكەتتىلىكتىڭ باستى اتريبۋتى - مەملەكەتتىك ءتىلدى قۇرمەتتەيتىن، وركەنيەتتىك ويلاۋ جۇيەسى بار، ەلىن الەمدەگى وركەنيەتتى ەلدەرمەن سالىستىرا تالداپ، ورگە سۇيرەيتىن [رەفورمانى ءتۇسىنىپ قولدايتىن] كەمەل تۇلعاسىن تاعايىنداسىن!

ونسىز دا پارلامەنت سايلاۋى سايلاۋ ەمەس، "تاعايىنداۋ" ەكەنىن جۇرت ءبىلىپ، ءبىراۋىزدان ايتىپ وتىر!

ەلدىڭ، ەل قۇرعان [قۇراعان] قازاقستان رەسپۋبليكاسى گارانتى رەتىندە سىزدەن وسىنى تالاپ ەتەمىن!تالاپ ەتۋ قر ازاماتى رەتىندە مىندەتىم ءحام ازاماتتىق پارىزىم دەپ بىلەمىن!

قۇرمەتپەن، جازۋشى،

عالىم قۇلبەك ەرگوبەك.

پىكىرلەر