QR Prezıdenti Q.K.Toqaevqa!
Asa mártebeli Qasymjomart Kemeluly!
Aı, Kúnniń amanynda shyqqyr kózim ne kórip otyrsyń?! Táýelsiz 30 jylda Ana tilimizdi - Memlekettik tilimizdi ardaqtaýdan jetken jerimiz osy bolǵany ma?! Jańa saılaýdan kútkenimiz osy ma edi?!
Búgin qasterli Ant berý rásiminde tilin shaınap turǵan depýtattar kúni erteń til arqyly júrekke ornyǵar dilimizdiń dal-dulyn shyǵaryp, shaınap tastaryna tipti de kúmán qalmaı otyr! Tildi bilmegen depýtat halqymyzdyń múddesine oraılasar jibi túzý órkenıetti zań qabyldaı qoıady ma?
Siz bastaǵan reformaǵa myna tilin shaınaǵan depýtattar ilese ala ma? Reforma - jańalyq! Jańalyqty qabyldaý, qoldaý úshin tyń tanym, sara sana, sony serpin kerek. Saqaý depýtattar boıynan Siz bastaǵan reformany túsinip, túısinip, qadirine jetip qoldaıtyn qasıet tabyla ma?
Depýtattar saqaý! Demek, Parlament saqaý! Saqaý parlament bul kúıinde marǵaý zań qabyldap, maqaý parlamentke aınalyp ketpes pe?! Endi ne shara?
Parlamentti taratý quzyryńyzda! Biraq, obal shyǵar! Halyq jeke depýtatqa emes, partııaǵa daýys berdi. Olaı bolsa partııalar saqaý depýtattardyń mandatyn qaıtaryp alsyn! Ornyna memlekettiliktiń basty atrıbýty - memlekettik tildi qurmetteıtin, órkenıettik oılaý júıesi bar, elin álemdegi órkenıetti eldermen salystyra taldap, órge súıreıtin [reformany túsinip qoldaıtyn] kemel TULǴASYN taǵaıyndasyn!
Onsyz da Parlament saılaýy saılaý emes, "taǵaıyndaý" ekenin jurt bilip, biraýyzdan aıtyp otyr!
Eldiń, el qurǵan [quraǵan] Qazaqstan Respýblıkasy Garanty retinde Sizden osyny talap etemin!Talap etý QR azamaty retinde mindetim hám azamattyq paryzym dep bilemin!
Qurmetpen, jazýshy,
ǵalym Qulbek ERGÓBEK.
