Mäjılıs deputaty Aidos Sarym äleumettık jelılerde Kaspii qūbyr konsorsiumynyŋ terminalyna jasalǧan şabuyldy qoldaǧan azamattardy jauapkerşılıkke tartudy talap etıp, Bas prokuror men Mädeniet jäne aqparat ministrıne ündeu joldady, dep habarlaidy «Adyrna» tılşısı.
Būǧan deiın qaznet qoldanuşylary memleket üşın strategiialyq maŋyzy bar infraqūrylym nysanyna jasalǧan şabuyldardy aşyq türde aqtaǧan edı. Mäjılıs deputatynyŋ pıkırınşe, mūndai äreketter söz bostandyǧyna berıletın konstitusiialyq qūqyq şegınen asyp, ūlttyq müddelerge tıkelei ziian keltıredı.
Aidos Sarym Bas prokuraturadan atalǧan jariialanymdarǧa qūqyqtyq baǧa berıp, olardy terrorizmdı nasihattau (QR QK 256-baby) nemese memlekettık opasyzdyq (QR QK 175-baby) retınde qarastyrudy sūrady.
Sonymen qatar ol halyq arasynda tüsındıru jūmystaryn jürgızıp, mūnai qūbyrlary men eldıŋ ekonomikalyq qauıpsızdıgı üşın asa maŋyzdy özge de infraqūrylym nysandaryn joiuǧa şaqyratyn aqparatty taratuǧa bolmaitynyn tüsındırudı ūsyndy.
Aita keteiık, KQK — Qazaqstan mūnaiyn eksporttaudyŋ negızgı baǧyty. El jyl saiyn osy qūbyr arqyly kemınde 60 million tonna mūnai jöneltedı. Qazırgı uaqytta Qazaqstan şabuyldan keiıngı şyǧyndardy eseptep jatyr. Energetika ministrı Erlan Aqkenjenovtıŋ mälımdeuınşe, Qazaqstan şabuyl saldarynan kem degende 480 myŋ tonna mūnai öndıre almai qalǧan.
Eske salaiyq, 29 qaraşada Astana uaqytymen 06:06-da Novorossiisk porty audanynda KQK-nyŋ teŋız infraqūrylym nysandaryna ekipajy joq jüzu qūraldary arqyly şabuyl jasalǧan edı. Şabuyl nätijesınde teŋızdegı qaşyqtaǧy ailaq qondyrǧysy VPU-2 (qalqymaly tieu qūrylǧysy) aitarlyqtai zaqymdalǧan.
