Mäjılıs deputaty Aidos Sarym "Ukrainany qoldaǧan Qazaqstan azamattaryn qylmystyq jauapqa tartuǧa baǧyttalǧan ärekettı jariia türde nasihattaǧany" jäne "Resei propagandasynyŋ narrativın" taratqany üşın ukrainalyq "Mirotvores" saitynyŋ derekqoryna engızıldı. Būl turaly Azattyq radiosy jazdy, dep habarlaidy “Adyrna”.
Sonymen qatar, saittyŋ habarlamasynda Kaspii qūbyr jelısı konsorsiumynyŋ infraqūrylymyna şabuyl jasalǧanan keiın Aidos Sarymnyŋ Qazaqstan bas prokurory Berık Asylovqa qaiyrylyp, "osy şabuyldy qoldaǧan azamattardyŋ äreketıne qūqyqtyq baǧa berudı" talap etkenı jäne mūndai äreketterdı "Terrorizmdı nasihattau" jäne "Memleketke opasyzdyq jasau" baptarymen qarastyrudy sūraǧany jazylǧan.
"Şyn mänınde, būl talaptar Ukraina men onyŋ azamattaryn qoldaudy tūnşyqtyru, Ukrainanyŋ özın qorǧau qūqyǧyn moiyndaǧan tūlǧalardy qudalau, Resei mūnaiynyŋ eksportymen bailanysty infraqūrylym müddesın qorǧauǧa baǧyttalǧan" dep jazylǧan saitta.
Deputattyŋ özı Ulysmedia bergen tüsınıktemesınde "ekı taraptyŋ da qara tızımıne ılıngenın" aitqan.
"Şynymdy aitsam, maǧan bärıbır. Būl külkılı. Men Resei men Ukrainanyŋ "qara tızımıne" bır mezette ılınıp otyrmyn. Sirek talant. Eger qalasa, ekı ret tızımge kırgızsın" dedı deputat.
Aidos Sarym sonymen bırge Ukraina Joǧarǧy radasyndaǧy ärıptesterımen bailanysyn üzbeitının de atap öttı.
"Men Ukrainaǧa qarsy närse aityp otyrǧan joqpyn ǧoi. Qazaqstandyq infraqūrylymdy bombalaǧanyna quanyp jatqan qazaqstandyqtarǧa qatysty aittym. Oǧan quanuǧa bolmaidy" dedı deputat.
Byltyr DW basylymy Qazaqstan parlamentınıŋ deputattary Aidos Sarym men Ermūrat Bapige jäne bırqatar özge qoǧam qairatkerıne Resei aumaǧyna kıruge tyiym salynǧanyn jazǧan edı. Aidos Sarymnyŋ sözınşe, 2021 jyly ony qolynda diplomatiialyq tölqūjat bolǧanyna qaramastan Mäskeuge kırgızbei qoiǧan. Resmi Astana būl jaily pıkır bıldırmegen.
Byltyr küzde ukrainalyq «Mirotvores» saity Qazaqstannyŋ yqpaldy saiasatkerlerınıŋ bırı, kezınde premer-ministr, bırneşe aimaqta äkım, elşı qyzmetın atqarǧan, 2026 jylǧa deiın Ūjymdyq qauıpsızdık şarty ūiymynda bas hatşy bop ıstegen İmanǧali Tasmaǧambetovtı de reseişıl adam retınde tızımge qosqan edı.
Aita ketsek, «Mirotvores» – ukrainalyq täuelsız, memlekettık emes ūiym. Sait 2014 jyly qūrylǧan. Bastama avtory – sol kezdegı ışkı ıster ministrınıŋ ştattan tys keŋesşısı qyzmetın atqarǧan Anton Geraşenko.
Platforma, negızınen, orys äskerı şebınde soǧysqandardyŋ, Resei baqylaityn Donesk jäne Luganskını qoldaǧan nemese anneksiialanǧan Qyrymǧa barǧan azamattardyŋ aty-jönın jariialaidy. Būdan bölek saitta okkupasiialanǧan ukrain jerınde jūmys ıstep, aqparat taratatyn jurnalister jaily da aqparat jiı şyǧady.
