Qazaqstan mūsylmandary dıni basqarmasy marqūmdardyŋ beinesın Jİ arqyly jandandyruǧa qatysty pıkır bıldırdı, dep habarlaidy «Adyrna» tılşısı.
QMDB tüsındıruınşe, būl jaǧdaiǧa bırjaqty baǧa beruge bolmaidy.
«İslam fiqh negızderı qaǧidasy boiynşa: "Bır närsege berıletın ükım ony dūrys tüsınıp, mänın anyqtauǧa bailanysty" dep belgılengen. Sondyqtan qaitys bolǧan adamdardyŋ suretterın jasandy intellekt arqyly qozǧalysqa keltırudıŋ ükımı ony qoldanu maqsaty men naqty jaǧdaiyna qarai ärtürlı bolady»,– delıngen habarlamada.
Degenmen, basqarma jasandy intellekttı qoldanudyŋ şekteulerı de bar ekenın mälımdedı. Atap aitqanda, marqūmnyŋ beinesın jandandyru adamnyŋ şynaiy ömırden alşaqtauyna, ötkenge bailanyp qaluyna, qaiǧysynyŋ qaita küşeiuıne nemese Allanyŋ ölımge qatysty belgılegen taǧdyryna qarsylyq tanytuyna sebep bolsa, mūndai äreketke jol berılmeidı. Aitularynşa, būl adamnyŋ özıne de, jaqyndaryna da ruhani jäne psihologiialyq tūrǧydan ziian keltıruı yqtimal.
Sondai-aq marqūmnyŋ közı tırısınde aitpaǧan sözderın onyŋ atynan söiletıp, jalǧan aqparat taratuǧa qataŋ tyiym salynatyny aityldy.
Būdan bölek, müftiiat marqūmdardyŋ jasandy intellekt arqyly özgertılgen beinesın kommersiialyq jarnamada paidalanudy da qūptamaitynyn jetkızdı. Öitkenı mūndai äreket tūtynuşylardy jaŋylystyryp, tauardy şynaiy emes jolmen nasihattauǧa jäne adamdardyŋ mülkın ädıletsız iemdenuge äkeluı mümkın.
