دەنساۋلىق ساقتاۋ مينيسترلىگى حالىقتى كوروناۆيرۋس ينفەكتسياسىنا قارسى جاپپاي ۆاكتسيناتسيانىڭ كەزەڭدەرى تۋرالى حاباردار ەتتى، دەپ حابارلايدى «ادىرنا» ءتىلشىسى.
اعىمداعى جىلدىڭ 1 اقپانىنان باستاپ حالىقتىڭ كۆي-گە قارسى ۆاكتسيناتسيالاۋدى باستاۋ جوسپارلانۋدا. ۆاكتسيناتسيا ەكپەنىڭ دايىندالۋىنا بايلانىستى كەزەڭ-كەزەڭىمەن جۇزەگە اسىرىلادى. بۇل رەتتە كونتينگەنتتەر مىناداي تۇردە بولىنگەن:
- I كەزەڭ – ينفەكتسيالىق اۋرۋحانالار، جەدەل مەديتسينالىق جاردەم، رەانيماتسيا جانە قارقىندى تەراپيا ءبولىمى (رقتب), مەديتسينالىق-سانيتاريالىق العاشقى كومەك (مساك), اۋرۋحانالاردىڭ قابىلداۋ بولمەلەرىنىڭ مەديتسينا قىزمەتكەرلەرى، سانەپيدقىزمەت قىزمەتكەرلەرى جاتادى – 100 000 ادام - 2021 جىلعى 1 اقپاننان باستاپ;
- II كەزەڭ – جالپى ءبىلىم بەرەتىن مەكتەپتەردىڭ، ارناۋلى ورتا وقۋ ورىندارىنىڭ (اووو), جوعارى وقۋ ورىندارىنىڭ (جوو) پەداگوگتارى، ۆەدومستۆولىق مەديتسينالىق قىزمەتىنىڭ مەديتسينا قىزمەتكەرلەرى – 150 مىڭ ادام – اعىمداعى جىلعى ناۋرىزدان باستاپ;
- III كەزەڭ – مەكتەپ-ينتەرناتتار، بالالاردىڭ مەكتەپكە دەيىنگى مەكەمەلەرى (بمدم) پەداگوگتارى، ستۋدەنتتەر، سوزىلمالى اۋرۋلارى بار ادامدار – 600 مىڭ ادام - اعىمداعى جىلعى ساۋىردەن باستاپ;
- IV كەزەڭ – ىشكى ىستەر مينيسترلىگى ء(ىىم), توتەنشە جاعدايلار مينيسترلىگى (تجم), قورعانىسمينى، ۇلتتىق قاۋىپسىزدىك كوميتەتى (ۇقك) قىزمەتىنىڭ قىزمەتكەرلەرى، باسقا ستاتسيونارلاردىڭ مەديتسينا قىزمەتكەرلەرى، بمدم پەرسونالى جانە سوزىلمالى اۋرۋلارى بار ادامدار – 600 مىڭ ادام - اعىمداعى جىلعى مامىردان باستاپ;
- V كەزەڭ – مەديتسينالىق-الەۋمەتتىك مەكەمەلەردىڭ كونتينگەنتى مەن پەرسونالى، بالالاردىڭ جابىق مەكەمەلەرىنىڭ قىزمەتكەرلەرى جانە سوزىلمالى اۋرۋلارى بار ادامدار – 600 مىڭ ادام اعىمداعى جىلعى ماۋسىمنان باستاپ;
- VI كەزەڭ – تاۋەكەل توبىنداعى قالعان كونتينگەنت – 600 مىڭ ادام اعىمداعى جىلعى شىلدە ايىنان جەلتوقسانعا دەيىن.
وسىلايشا، جىل سوڭىنا دەيىن 6 ملن.قازاقستاندىققا ۆاكتسينا ەگۋ جوسپارلانۋدا.
«جۇيەلى ەسەپكە الۋ ماقساتىندا ۆاكتسيناتسيانىڭ ەلەكتروندىق پاسپورتى ازىرلەندى. ۆاكتسيناتسيا جۇرگىزۋ تۋرالى دەرەكتەر مينيسترلىكتىڭ ورتالىقتاندىرىلعان اقپاراتتىق جۇيەسىندە ەلەكتروندىق فورماتتا جۇرگىزىلەتىن بولادى. ۆەب-قوسىمشادا پاتسيەنت پەن مەديتسينا قىزمەتكەرىنىڭ m-gov ءموبيلدى قوسىمشاسىندا اقپاراتتى قولمەن ەنگىزۋ مۇمكىندىگى بار. جۇيە جاھاندىق اقپاراتتىق جۇيەلەرمەن ينتەگراتسيالانۋعا قابىلەتتى جانە ۆاكتسيناتسيا العان بارلىق ادامدارعا تالاپ ەتىلەتىن جەردە جانە ەركىن قوزعالۋ ءۇشىن اقپارات بەرۋگە مۇمكىندىك بەرەدى»، - دەدى ا.تسوي.
«ادىرنا» ۇلتتىق پورتالى
