الەۋمەتتىك جەلىدە ءيتتى كولىكپەن سۇيرەگەن تاعى ءبىر جۇرگىزۋشىنىڭ ۆيدەوسى تارادى. بەينەجازبا Instagram جەلىسىندەگى Inucobo زوولوگيالىق قورعاۋ ۇيىمىنىڭ پاراقشاسىندا جاريالاندى، دەپ حابارلايدى «ادىرنا» ءتىلشىسى.
وقيعا اقمولا وبلىسىنا قاراستى قوياندى اۋىلىندا بولعان. جانۋار قورعاۋشىلارىنىڭ ءبىرى بۇل جاعدايدى بايقاپ قالىپ، پوليتسياعا ارىز بەرگەن.
اقمولا وبلىستىق پوليتسيا دەپارتامەنتى ءيتتى كولىكپەن سۇيرەگەن ادامدى ىزدەپ تاپتى. ول قوياندى اۋىلىنىڭ 37 جاستاعى تۇرعىنى بولىپ شىقتى. ءباسپاسوز قىزمەتىنىڭ حابارلاۋىنشا، ەر ادامعا قاتىستى اكىمشىلىك حاتتاما تولتىرىلعان.
ايتا كەتەيىك، زاڭدا جانۋارلاردىڭ جاراقات الۋىنا نەمەسە ولۋىنە اكەلەتىن كەز كەلگەن قاتىگەزدىك ءۇشىن ايىپتالۋشىعا 120 اەك مولشەرىندە ايىپپۇل سالۋ قاراستىرىلعان.
«ادىرنا» ۇلتتىق پورتالى
