مولدوۆا، ۋكراينا ورىس تىلىنەن باس تارتتى

2954
Adyrna.kz Telegram

كەشە مولدوۆا رەسپۋبليكاسىنىڭ كونستيتۋتسيالىق سوتى ەلدە  «ورىس تىلىنە مارتەبە بەرۋ زاڭسىز» دەپ مالىمدەمە جاسادى. ويتكەنى بۇل مولدوۆانىڭ كونستيتۋتسياسىنا قايشى كەلەدى.

— بۇل مولدوۆا رەسپۋبليكاسى كونستيتۋتسيالىق سوتىنىڭ سوڭعى شەشىمى. بۇدان ءارى ءىس قاراۋعا جاتپايدى. شەشىم جارىق كورگەن كۇننەن باستاپ كۇشىنە ەنەدى جانە وعان قارسى ەشكىم دە شاعىم تۇسىرە المايدى، – دەپ مالىمدەدى جۋرناليستەر الدىندا كونستيتۋتسيالىق سوتتىڭ توراعاسى دومنيكا مانولە.

الايدا مولدوۆاداعى وپپوزيتسيالىق پارتيالاردىڭ قارسىلىق بىلدىرۋىنە قاراماستان اتالعان شەشىم كۇشىندە قالا بەرەتىن بولدى. رەسەيگە بۇيرەگى بۇرىلا قويمايتىن ەۋروپالىق باعىتتى ۇستانعىسى كەلەتىن مولدوۆالىق ۇلتشىلدار كونستيتۋتسيالىق سوتتىڭ بۇل قادامىن قۇپتاپ وتىر. ولار تاۋەلسىز ەل ەشكىمگە تاۋەلدى بولماي، ءوز الدىنا دەربەس ساياساتىن جۇرگىزۋى كەرەك دەپ سانايدى.

بۇل عانا ەمەس، ۋكراينا ەلى دە وتكەن اپتادان باستاپ، ەلدەگى بارلىق قىزمەت تۇرلەرىن تەك قانا ۋكراين تىلىندە جۇزەگە اسىراتىنىن ءمالىم ەتتى. ءتىپتى ۋكراينا جوعارى راداسىنىڭ توراعاسى اندرەي پارۋبي جيىندا ورىس تىلىندە سويلەگەن كەيبىر وپپوزيتسيالىق پارتيا وكىلدەرىنىڭ ميكروفونىن ءوشىرىپ تاستاعان وقيعالار ءجيى كەزدەستى.

ول ورىستاردىڭ «ۋكراينانى  مادەني وككۋپاتسيالاۋ ۋاقىتى ءوتتى» دەپ مالىمدەدى. جوعارى رادا «تەك قانا ۋكراين تىلىندە سويلەۋى ءتيىس» دەپ تالاپ قويدى. قازىر ەل  تەك قانا ۋكراين تىلىندە سويلەپ، قىزمەت ەتۋدى ۇيرەندى جانە جاعداي قالىپقا ءتۇستى. بۇلىنگەن ەشنارسە جوق. مىنە تاۋەلسىز ەل ساياساتىن وسىلاي دەربەس جۇرگىزەدى. مولدوۆا رەسپۋبليكاسىندا دا مەملەكەتتىك مولدوۆان ءتىلىن قادىرلەۋ ارتا ءتۇستى.

اڭگىمەنىڭ اقيقاتى، ءوز ءتىلىن قادىرلەمەي وتىرعان ءبىزدىڭ ورىسقۇل بيلىك قانا. كوز الدىڭىزعا ەلەستەتىپ كورىڭىزشى، مىنانداي  كورىنىس بىزدە قايتالانۋى مۇمكىن بە؟ ءماجىلىس توراعاسى نۇرلان نىعماتۋلين ورىس تىلىندە سويلەگەن ءبىر دەپۋتاتتىڭ ميكروفونىن ءوشىرىپ تاستاپ، «مەملەكەتتىك تىلدە سويلە» دەپ قاتتى تالاپ قويىپ جاتسا... كەز كەلگەن جاقسى نارسەگە بوركىن اسپانعا اتىپ، قۋانا كەتەتىن  قازاق نىعماتۋليندى ۇلت قاھارمانىنا اينالدىرىپ جىبەرەر ەدى- اۋ.

وزبەك ، ازەربايجان، تۇرىكمەن، تاجىك، گرۋزين مەن ارمياننىڭ دا بيلىگى مەن ءماجىلىسى جانە زاڭ شىعارۋشى ورگاندارى ءوز تىلىندە سويلەيدى جانە ءىس-قاعازدارىن مەملەكەتتىك تىلدە جۇرگىزەدى. ال ءبىزدىڭ دەپۋتاتتار قازاق ماجىلىسىندە تۇرىپ،  انتتى رەسەي تىلىندە قابىلدايدى. ساناعا سىيمايدى. تىرلىكتەرى تۇسىنىكسىز.

ءبىزدىڭ ورىسقۇل بيلىك قانا ورىسشا سويلەپ، جىلى ورىنتاعىن اۋىستىرعىسى كەلمەي ءالى ءوز ورىندارىندا وتىر. ولار ورىسشا سويلەيتىن جانە ورىسشا ويلايتىن جاس ۇرپاقتى كوبەيتىپ جاتىر. زاردابى وراسان زور بولاتىن بۇل قاۋىپتى كىم توقتاتا الادى؟!

...وزەگىڭدى ورتەيتىن وكىنىش وسى.

ەركىن قالدان،

«ادىرنا» ۇلتتىق پورتالى.

 

پىكىرلەر