م.اۋەزوۆ اتىنداعى ادەبيەت جانە ونەر ينستيتۋتىنىڭ كونفەرەنتس-زالىندا الماتى قالاسىنىڭ 1000 جىلدىعىنا جانە قازاقستان رەسپۋبليكاسىنىڭ تاۋەلسىزدىگىنىڭ 25 جىلدىعىنا ارنالعان الماتى قالاسى ىشكى ساياسات باسقارماسىنىڭ قولاۋىمەن "ۇلى دالانىڭ ەجەلگى جازبا دەرەكتەرى مەن ارتەفاكتىلەرى" اتتى حالىقارالىق دوڭگەلەك ۇستەل ءوتتى.
جازبا دەرەكتەرى مەن ارحەولوگيا تاراپىنداعى عىلىمي باياندامالاردان بولەك عىلىم سالاسىنداعى وزەكتى ماسەلەلەر تالقىلاندى.
الماتى قالاسى تىلدەردى دامىتۋ باسقارماسىنىڭ باسشىسى، ف.ع.ك. ماماي احەت پەن ر.ب. سۇلەيمەنوۆ اتىنداعى شىعىستانۋ ينستيتۋتى ديرەكتورىنىڭ ورىنباسارى، ە.ع.ك. دوتسەنت عالىمجان دۇيسەن كىرىسپە ءسوز سويلەپ، شاراعا قاتىسۋشىلارعا ساتتىلىك تىلەسە، ءال-فارابي اتىنداعى قازۇۋ-دىڭ جۋرناليستيكا فاكۋلتەتىنىڭ دەكانى، ف.ع.د. ساعاتبەك مەدەۋبەكۇلى تاريحي-مادەني ەسكەرتكىشتەردىڭ ماڭىزدىلىعى تۋرالى وزەكتى ماسەلەلەردى ورتاعا سالدى.
ۇعا-نىڭ كورەسپوندەنت-مۇشەسى، ت.ع.د.، پروفەسسور مەرۋەرت ابۋسەيىتوۆا "مادەني مۇرا" جانە "حالىق تاريح تولقىنىندا" باعدارلاماسى نەگىزىندە شەتەلدەردەن ەلگە جەتكىزىلگەن قۇندى ماتەريالدارمەن تانىستىردى. ودان كەيىن PhD دوكتور، پروفەسسور ءتوربات تساگاانى "موڭعول ءداۋىرىنىڭ ەليتالىق ارحەولوگيالىق ەسكەرتكىشتەرى" اتتى بايانداما جاسادى. اتاۋلى بايانداما قازاقستاندىق عالىمدار تاراپىنان قىزۋ تالقىلاندى.
بەلگىلى تۇرىكتانۋشى ءناپىل بازىلحان، تانىمال ارحەولوگ ارناباي نۇرجانوۆ، كورنەكتى فولكلورتانۋشى قايرات جاناباەۆ جانە تاعى باسقا وتاندىق عالىمدار قىزىقتى باياندامالارىن ۇسىندى. سونىمەن قاتار، قر مەملەكەتتىك ورتالىق مۋزەي ديرەكتورىنىڭ ورىنباسارى باباقۇمار قيناياتۇلى قازاقستان مەن موڭعوليا اراسىنداعى عىلىمي قارىم-قاتىناس، ارىپتەستىك بايلانىس تۋرالى ءوز ۇسىنىستارىن ورتاعا سالدى.
الماتى قالاسى ىشكى ساياسات باسقارماسىنىڭ قولداۋىمەن "ادىرنا" ۇلتتىق-ەتنوگرافيالىق بىرلەستىگى الماتى قالاسىنىڭ 1000 جىلدىعىنا ارنالعان بەينە-روليكتىڭ كورسەتىلىمى بولدى.
تانىمال جاس ءانشى باقتيار اقىمجانوۆ پەن قۇرانعازى اتىنداعى قازاق ۇلتتىق كونسەرۆاتورياسىنىڭ ستۋدەنتى، جاس كۇيشى
مۇحتار ءادىل يگى شارانىڭ ءسانىن كەلتىرىپ، ءان مەن كۇيدەن شاشۋ شاشتى.
موڭعوليا عىلىم اكادەمياسىتاريح جانە ارحەولوگيا ينستيتۋتى مەن قر بعم عك ر.ب.سۇلەيمەنوۆ اتىنداعى شىعىستانۋ ينستيتۋتى اراسىندا ارىپتەستىك بايلانىس ورناتۋ ماسەلەلەرى دە ءسوز بولدى. موڭعوليا عىلىم اكادەمياسى تاريح جانە ارحەولوگيا ينستيتۋتىنىڭ قولا جانە ەرتە تەمىر ءداۋىرى ءبولىمىنىڭ مەڭگەرۋشى ءتوربات تساگاانى "ورتالىق ازيانىڭ ارحەولوگيالىق ەسكەرتكىشتەرىنىڭ ەرەكشەلىكتەرى" اتتى لەكتسيا-سەمينارىنا قاتىسقان كىسىلەرگە العىس حاتتار مەن سەرتيفيكاتتار تابىستادى. سونىمەن بىرگە، "ادىرنا" ۇلتتىق-ەتنوگرافيالىق بىرەستىگى 2016 جىلى وتكىزگەن تاريحي شارالارعا ات سالىسقان ازاماتتارعا العىس حاتتار، "الماتىنىڭ مىڭجىلدىق تاريحى: ارحەولوگيا جانە جازبا دەرەكتەرى" اتتى حالىقارالىق كونفەرەنتسيلارعا قاتىسقان عالىمدارعا سەرتيفيكاتتار تابىستادى.
ارمان اۋباكىر،
"ادىرنا" ۇلتتىق-ەتنوگرافيالىق بىرلەستىگىنىڭ جەتەكشىسى.
