وتكەن اپتادا ەلىمىزدىڭ بىرنەشە ايماعىندا ءورت شىعىپ، سالدارىنان ادام شىعىنى ورىن الدى دەپ جازادى «ادىرنا» ۇلتتىق پورتالى.
ءتىلسىز جاۋدىڭ بۇل جولعى قۇرباندارى دا بالالار بولدى. وسىعان دەيىن نۇر-سۇلتان قالاسىنىڭ ىرگەسىندە بولعان ورتتەن 5 بىردەي بالانىڭ اجال قۇشقانى ەستە. اقپاننىڭ 19-ى كۇنى دە ءدال وسىعان ۇقساس قايعىلى وقيعا جامبىل وبلىسى، سارىسۋ اۋدانىنا قاراستى جاڭاتاس قالاسىندا بولدى. جانىندا اتا-اناسى بولماعان بەس بىردەي ءبۇلدىرشىن وتقا وراندى.
ال وسىدان ءبىر كۇن بۇرىن، ياعني اقپاننىڭ 18-ءى كۇنى قىزىلوردادا دا جەر ءۇي ورتەنىپ، بەس بالا تۇتىنگە تۇنشىققان. وقيعا قىزىلجارما شاعىناۋدانىندا بولعان.
وتقا ورانعان باسپانادان اناسى مەن ءتورت قىزى شىعىپ ۇلگەرىپتى. ال 2019 جىلى دۇنيەگە كەلگەن ءسابي بەسىگىمەن بىرگە جانىپ كەتكەن.
قىزىلوردا مەن جامبىل وبلىسىنان بولەك، وسى كۇنى الماتىنىڭ ىرگەسىندەگى تۇزدىباستاۋ اۋىلىندا جەر ءۇي ورتەنىپ كەتتى. ابىروي بولعاندا ادام شىعىنى جوق.
ال، وسكەمەندە ءورت شىققان تۇرعىن ۇيدەن 13 ادام قۇتقارىلدى. ىس تيگەن 12 جاسار بالا اۋرۋحاناعا جەتكىزىلدى. بالانىڭ جاعدايىن دارىگەرلەر قالىپتى دەپ باعالاپ وتىر.
