سوڭعى ءبىر اپتا ىشىندە ەۋروپانىڭ بىرنەشە ەلىندە، اسىرەسە فرانتسيا مەن يسپانيادا ورمان ورتتەرى تۇتانىپ، جالپى سانى 330 مىڭنان استام ادام ەۆاكۋاتسيالاندى. بۇل تۋرالى BBC جازدى، دەپ حابارلايدى «ادىرنا» ءتىلشىسى.
فرانتسيانىڭ ىشكى ىستەر ءمينيسترى لوران نۋنەس وڭىردەگى جاعدايدىڭ «وتە كۇردەلى» بولىپ قالا بەرەتىنىن ايتىپ، ءورتتىڭ «بوردو باعىتىنا قاراي جىلجىپ جاتقانىن» مالىمدەدى. ءورت 42 مىڭ گەكتار اۋماقتى جويىپ، ەكىنشى دۇنيەجۇزىلىك سوعىستان بەرگى ەل تاريحىنداعى ەڭ ءىرى ورمان ورتتەرىنىڭ بىرىنە اينالعان.
جالپى جىل باسىنان بەرى فرانتسيادا شامامەن 98 مىڭ گەكتار جەر ورتەنىپ كەتكەن.
ءورتتىڭ تارالۋىنا قۇرعاق وسىمدىكتەر مەن قاتتى جەل سەبەپ بولىپ وتىر. وسىعان بايلانىستى فرانتسيادان يسپانياعا باراتىن A63 اۆتوماگيسترالىنىڭ 60 شاقىرىمدىق بولىگى جابىلعان.
لوران نۋنەس La Tribune باسىلىمىنا بەرگەن سۇحباتىندا ءورتتى تولىق باقىلاۋعا الۋ ءۇشىن «كوپ ۋاقىت قاجەت بولاتىنىن» ايتتى. ونىڭ سوزىنشە، جالىن اۋىزدىقتالمايىنشا ەۆاكۋاتسيالانعان تۇرعىندار مەن تۋريستەر ۇيلەرىنە قايتا المايدى.
فرانتسيا بيلىگى ورتپەن كۇرەسكە اسكەري كۇشتەردى دە جۇمىلدىرعان. قوسىمشا ارميا بولىمشەلەرى ءورت سوندىرۋشىلەرگە وسىمدىكتەردى تازارتۋعا جانە ورتكە قارسى قورعانىس جولاقتارىن جاساۋعا كومەكتەسۋدە.
فرانتسيا پرەزيدەنتى ەممانيۋەل ماكرون ەلدىڭ ء«بارىن قالپىنا كەلتىرەتىنىن» جانە ۇكىمەتتىڭ زارداپ شەككەندەرگە «قاجەت بولعانشا كومەك كورسەتەتىنىن» مالىمدەدى.
ال يسپانيادا ورمان ورتتەرى ءالى دە تارالىپ جاتىر. مادريد پەن اۆيلا ماڭىنداعى اۋدانداردان 90 مىڭنان استام ادام ەۆاكۋاتسيالانعان.
سەنبى كۇنى كەشكە بيلىك تولەدو ماڭىنداعى كەمىندە سەگىز مۋنيتسيپاليتەت تۇرعىندارىن دا ەۆاكۋاتسيالاۋ تۋرالى شەشىم قابىلداعان. الايدا تابيعي اپاتتان قانشا ادامنىڭ زارداپ شەككەنى ازىرگە ناقتىلانباعان.
مادريد اۆتونوميالىق قاۋىمداستىعىنىڭ باسشىسى يسابەل دياس ايۋسو بۇل جاعدايدى ء«وڭىر تاريحىنداعى ەڭ قورقىنىشتى ءورت» دەپ اتادى. ال يسپانيا پرەمەر-ءمينيسترى پەدرو سانچەس الدا «قيىن كەزەڭدەر كۇتىپ تۇرعانىن» ەسكەرتتى.
سەنبىدەن جەكسەنبىگە قاراعان ءتۇنى ۆالەنسيا جاعالاۋىنا جاقىن ماڭدا ءورتتىڭ جاڭا وشاعى پايدا بولدى.
ء«ورت ءبىزدىڭ مۇمكىندىكتەرىمىزدەن اسىپ ءتۇستى»، – دەدى ۆالەنسيا ءوڭىرىنىڭ باسشىسى حۋانفران پەرەس لوركا.
ەل بيلىگى ءورت سالدارىنان ءبىر ەر ادامنىڭ قازا تاپقانىن راستادى.
