«جوعارى ءبىلىمىمىز بولا تۇرا، جالاقىمىز ەدەن جۋشىلارمەن بىردەي». ءدال وسىنداي ۋاجبەن «ادىرنا» ۇلتتىق پورتالىنىڭ رەداكتسياسىنا قىزىلوردالىق لوگوپەد-دەفەكتولوگتار حابارلاستى. قىزمەتكەرلەردىڭ ايلىق جالاقىلارى ءبىر جىلدان بەرى وزگەرمەگەن.
«وسى ماسەلەنى قانشا كوتەرسەك تە، ەش وزگەرىس بولمادى. جازىپ شارشادىق»،-دەيدى ولار.
لوگوپەد-دەفەكتولوگتاردىڭ ەندىگى ءۇمىتى قر پرەزيدەنتى ق.توقاەۆ پەن دەنساۋلىق ساقتاۋ ءمينيسترى ا.تسويدا. نازارلارىڭىزعا مامانداردىڭ اشىق حاتىن ۇسىنامىز.
قازاقستان رەسپۋبليكاسىنىڭ پرەزيدەنتى
ق.ك.توقاەۆقا
قر دەنساۋلىق ساقتاۋ ءمينيسترى
ا.ۆ.تسويعا
قۇرمەتتى قاسىم-جومارت كەمەلۇلى، الەكسەي ۆلاديميرۇلى! بىز – قىزىلوردا وبلىسىنىڭ دەنساۋلىق ساقتاۋ باسقارماسىنا قارايتىن لوگوپەد-دەفەكتولوگ ماماندارمىز. ايلىق جالاقىمىز ءبىر جىلدان بەرى وزگەرمەگەندىكتەن، سىزدەرگە اشىق حات جولداپ وتىرمىز. جوعارى ءبىلىمىمىز بولا تۇرا ايلىق جالاقىمىز ەدەن جۋشىلارمەن بىردەي.
2020 جىلدىڭ 1 قاڭتارىنان باستاپ دارىگەرلەردىڭ جالاقىسى ورتاشا 30% -عا ء(تىپتى كىشى قىزمەتكەرلەردىڭ جالاقىسى دا), ءبىلىم بەرۋ ۇيىمدارى پەداگوگتارىنىڭ لاۋازىمدىق جالاقىسى 25%-عا ءوستى. ال دەنساۋلىق ساقتاۋ سالاسىندا جۇمىس جاسايتىن لوگوپەد-دەفەكتولوگ مامانداردىڭ جالاقىسى وزگەرىسسىز قالدى.
وسى ساۋالدى قر دەنساۋلىق ساقتاۋ مينيسترلىگىنە جولداعانىمىزدا «قر ۇكىمەتىنىڭ 2015 جىل 31 جەلتوقسان №1193 قاۋلىسىنا دەنساۋلىق ساقتاۋ سالاسى پەداگوگتارىنىڭ لاۋازىمدارىن قوسۋ بولىگىندە وزگەرىستەر مەن تولىقتىرۋلار ەنگىزىلەدى» دەگەن جاۋاپ الدىق. الايدا جاۋاپ كەلگەلى 1 جىلدان اسا ۋاقىت وتسە دە، لوگوپەد-دەفەكتولوگ مامانداردىڭ ەڭبەك اقىسى كوتەرىلمەدى. بيىل دا مەديتسينا قىزمەتكەرلەرى مەن پەداگوگتەردىڭ جالاقىلارى ءوستى. تەك لوگوپەد-دەفەكتولوگتار عانا سول باياعى جارتىمسىز جالاقىمەن قالدىق.
دەنساۋلىق ساقتاۋ سالاسىنداعى لوگوپەد-دەفەكتولوگ ماماندار دا مىندەتتى الەۋمەتتىك مەديتسينالىق ساقتاندىرۋ جۇيەسى بويىنشا جۇمىس جاساپ وتىر. قازىرگى تاڭدا ءار ءتۇرلى دارەجەدەگى ءتىل كەمىستىكتەرى، پسيحيكالىق تەجەۋلىك، بتسپ، اۋتيزم، داۋن سيندرومى، ت.ب لوگوپەديالىق دياگنوزدارمەن كەلەتىن بالالارعا جانە ينسۋلت العان ەرەسەكتەرگە كومەك كورسەتۋدەمىز. ءجۇرىپ تۇرۋى قيىن ناۋقاستاردىڭ ۇيىنە شاقىرتۋمەن بارامىز. بۇل ناۋقاستارمەن جۇمىس جاساعانىمىز ءۇشىن بىزگە قوسىمشا اقى تولەنىپ وتىرعان جوق. ال مەكتەپتەگى لوگوپەد-دەفەكتولوگ ماماندارعا وسى قىزمەتتەردى اتقارعانى ءۇشىن بەلگىلى ءبىر سوما تولەنەدى.
قۇرمەتتى الەكسەي تسوي مىرزا، جوعارىدا كورسەتىلگەن قاۋلىعا قاشان وزگەرتۋ ەنگىزىلەدى؟ بىزگە نەگە پەداگوگ مارتەبەسى بەرىلمەيدى؟ پەداگوگ مامان رەتىندە كاتەگورياگا تاپسىرۋعا نەگە رۇقسات جوق؟ ءتىپتى ارامىزداعى كاتەگورياسى بار ماماندارعا قوسىمشا اقى تولەنبەۋدە. جالپى اۋادا جۇرگەن مامان يەسىمىز. بۇل سوندا كەمسىتۋشىلىك پە، تومەندەتۋ مە، الدە جوعارى ءبىلىمدى مامان رەتىندە قۇقىعىمىزدىڭ تاپتالۋى ما؟ سۇراق كوپ، جاۋاپ سىزدەن مينيستر مىرزا...
قۇرمەتتى گۇلشارا ناۋشاقىزى، سىزدەن دە وسى ماسەلەنى باستى نازارعا الىپ، بىزگە باسشىلىقتىڭ قىسىم كورسەتۋىنە جول بەرمەۋىڭىزدى سۇرايمىز.
قۇرمەتپەن، قىزىلوردالىق لوگوپەد-دەفەكتولوگتار
