سوڭعى مالىمەتتەرگە قاراعاندا ەلىمىزدەگى مەكتەپكە دەيىنگى جاستاعى بالالاردىڭ 16%-ى ەتجەڭدىلىكتەن جانە باسقا دا سىرقاتتاردان زارداپ شەگەدى ەكەن.
ال، 15 جاسقا قاراي سوزىلمالى اۋرۋلارعا شالدىققان بالالاردىڭ قاتارى 20%-عا جەتىپ وتىر. جاعدايدى جاقسارتۋ ءۇشىن عالىمدار ارنايى «بالامان» باعدارلاماسىن جاساپ شىقتى.
«بالامان» باعدارلاماسى – بۇل قازاقستان مەكتەپتەرىنە كەزەڭ-كەزەڭىمەن ەنەتىن دۇرىس تاماقتانۋ مەن دەنە شىنىقتىرۋدى ناسيحاتتاۋدىڭ ءبىرتۇتاس جۇيەسى. باستاپقىدا قاناتقاقتى جوبانى استانا مەن الماتىداعى ەكى مەكتەپتە سىناقتان وتكىزۋ ۇيعارىلعان.
گۇلنار ايتقۇلوۆا، قالالىق ءبىلىم بەرۋ باسقارماسى باسشىسىنىڭ ورىنباسارى:
- الاتاۋ اۋدانىندا ەكى مەكتەپ بەلگىلەنگەن. سول مەكتەپ وسى باعدارلاماعا سايكەس ءوز جوسپارلارىنا وزگەرىستەر ەنگىزەدى. ەڭ ءبىرىنشى، بۇل جەردە مەكتەپتىڭ اكىمشىلىگىنەن، مەكتەپتىڭ ۇستازدارى جانە بۇكىل مەكتەپتىڭ قىزمەتكەرلەرى وقۋدان وتەدى. جانە دە بۇل باعدارلامادا ءبىرىنشى كەزەڭدە باستاۋىش سىنىپتىڭ بالالارى قاتىسادى.
مەكتەپتىڭ دەنە شىنىقتىرۋ جانە باسقا دا پاندەردىڭ مۇعالىمدەرى ءۇشىن ارنايى ترەنينگ ۇيىمداستىرىلادى. عالىمداردىڭ پىكىرىنشە، سالاماتتى ءومىر سالتىن ناسيحاتتاۋدىڭ جاڭا ءتاسىلىنىڭ ءداستۇرلى ادىستەمەدەن ايتارلىقتاي ايىرماشىلىعى بار.
مۇرات ابەن، قوعام قايراتكەرى:
- بۇل سالانى تەك مەديتسينا سالاسىنىڭ قولىنا بەرىپ قويىپ، اۋىرتساڭ - اۋىرتىڭدار، ەمدەسەڭدەر - ەمدەڭدەر دەپ، قىمبات ءدارىنى ساتام دەسەڭدەر - ساتىڭدار دەپ قوياتىن بولساق، ءبىز ناتيجەگە جەتپەيمىز. جانە وزىمىزگە قاراپ تۇرساق، اۋرۋشاڭدىق بويىنشا بىزدە پروبلەما وتە كوپ.
باعدارلاما اۆتورلارى دۇرىس تاماقتانۋمەن قاتار بەلسەندى جانە ۇزاق ءومىر سۇرۋگە ۇمتىلۋعا ىقپال ەتەتىن جاڭا باعدارلاما قوعامدا قولداۋعا يە بولادى دەگەن سەنىمدە.
اۆتورلارى: باقىت بۇحاربەك، اسقار سەرعاليەۆ، كەنجە امراەۆ 24.kz
