قىزىلجاردا جيەنى پىشاقتاعان 89 جاستاعى كەيۋانا باقيلىق بولدى، دەپ حابارلايدى «ادىرنا» ءتىلشىسى «استانا» ارناسىنا سىلتەمە جاساپ.
ناۋرىزدىڭ 10-ى كۇنى قاسكويدىڭ پىشاعىنا ىلىنگەن زەينەتكەر، وبلىستىق اۋرۋحانىنىڭ جانساقتاۋ بولىمىندە جاتتى. تۇلا بويى تىلىمدەلگەن اجەيدىڭ جاعدايىن دارىگەرلەر اۋىر دەپ باعالاعان بولاتىن. كۇردەلى وتادان كەيىن، قاريا ەسىن جيماعان كۇيى، اراعا ءۇش اپتاداي ۋاقىت سالىپ كوز جۇمعان. ال الماتىدان كەلىپ ناعاشىلارىن باۋداي قىرعان جيەننىڭ ءىسىن، پوليتسەيلەر ءالى تەرگەپ جاتىر.
«ەڭ الدىمەن قىلمىستىق ءىس قر قىلمىستىق كودەكسىنىڭ 99 بابى ەكىنشى ءبولىمى، ادام ءولتىرۋ بويىنشا قوزعالدى. قازىر بۇل ءىس ءبىرىنشى جانە ەكىنشى پۋنكتىگە ساي، ياعني ەكى ادامدى قاساقانا ءولتىرۋ بابىنا اۋىستىرىلدى. ەندى ول 15 جىلدان 20 جىلعا دەيىن باس بوستاندىعىنان ايىرىلۋى مۇمكىن»،- دەيدى سقو پوليتسيا دەپارتامەنتىنىڭ تەرگەۋ باسقارماسىنىڭ ءبولىم باسشىسى مارال احمەتبەكوۆ.
ەسكە سالايىق، جاعا ۇستاتارلىق قاندى وقيعا ناۋرىزدىڭ باسىندا پەتروپاۆلداعى كوتتەدجدەردىڭ بىرىندە بولعان ەدى. 30 جاستاعى الماتى تۇرعىنى ءوزىنىڭ قىزىلجارداعى تۋىسقاندارىنا تۇندە كەلىپ، 3 ادامدى قان-جوسا ەتىپ پىشاقتاپ تاستاعان. العان دەنە جاراقاتتىرىنان 48 جاستاعى وتاناسى، سول كۇنى وپەراتسيا كەزىندە قايتىس بولدى. ءۇشىنشى جابىرلەنۋشى — 29 جاستاعى جىگىت قازىر ءالى اۋرۋحانادا جاتىر. پوليتسەيلەر قاسكويدى سول كۇنى بىردەن قۇرىقتادى.
«ادىرنا» ۇلتتىق پورتالى
