تۇركىستان قالاسىنداعى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتيتىنىڭ بوتانيكالىق باعىندا وتىرعىزىلعان 3000 ءتۇپ نازارباەۆ قىزعالداعى گۇلدەدى، دەپ حابارلايدى «ادىرنا» ءتىلشىسى وبلىس اكىمدىگىنىڭ ءباسپاسوز قىزمەتىنە سىلتەمە جاساپ.
«پرەزيدەنت نازارباەۆ» دەپ اتالاتىن قىزعالداقتىڭ جاڭا سۇرىپى بىلتىر ەگىلگەن. تۇركى ەلدەرىنىڭ سامميتىنە وراي نازارباەۆ قىزعالداعىن ارنايى جىلىجايدا وسىرۋمەن جانە كۇتىم جاساۋمەن اۋىل شارۋاشىلىعى عىلىمدارىنىڭ دوكتورى، پروفەسسور امانگەلدى اپۋشەۆ جانە بيولوگيا عىلىمدارىنىڭ كانديداتى باحادۋر يۋسۋپوۆتىڭ جەتەكشىلىگىمەن جۇزەگە اسۋدا. الداعى ۋاقىتتا قىزعالداق گۇلىنىڭ سانىن ەداۋىر ارتتىرۋ كوزدەلگەن.
«قازاقستان – قىزعالداقتىڭ وتانى بولىپ سانالاتىنىن عالىمدار عىلىمي ەڭبەكتەدە دالەلدەگەن جانە ەلباسى ءوزىنىڭ «ۇلى دالانىڭ جەتى قىرى» ماقالاسىندا دا ەرەكشە اتاپ ءوتتى. قازاقستان جەرىنەن العاش رەت دالا قىزعالداقتارى XVIII عاسىردا تۇرىك پاديشاحتارى ارقىلى تۇركياعا، ودان ءارى اۆستريا مەن گوللاندياعا تاراتىلدى. قازىرگى كەزدە گوللانديا ەلى قىزعالداقتىڭ ءتۇرلى سورتتارىن شىعارۋدا. ەلباسى ن.نازارباەۆتىڭ ماقالاسى شىققاننان كەيىن، گوللانديادا 3 ءتۇرلى سورتتى قىزعالداقتىڭ ءتۇرى دايىندالدى. اتاپ ايتقاندا، «پرەزيدەنت نازارباەۆ»، «رەسپۋبليكا كازاحستان»، «استانا» سورتتارى»، – دەيدى بيولوگيا عىلىمدارىنىڭ كانديداتى باحادۋر يۋسۋپوۆ.
تۇركىستان قالاسىنىڭ تۇرعىندارى مەن قوناقتارى ەلباسى اتىمەن اتالاتىن اسەم قىزعالداق گۇلىن ۋنيۆەرسيتيتتىڭ بوتانيكالىق باعىنان تاماشالاي الادى. ۋنيۆەرسيتەت عالىمدارىنىڭ قىزعالداق ءوسىرۋدىڭ زاماناۋي تەحنولوگيالارىن يگەرۋىنىڭ ارقاسىندا بيىلعى جىلى بوتانيكالىق باقتا قىزعالداقتىڭ 7 سورتى ءوسىرىلىپ، گۇلدەدى. ۋنيۆەرسيتەت عالىمدارىنىڭ قىزعالداقتىڭ بۇل ءتۇرىن جاپپاي ءوسىرۋدى قولعا الماق. سونداي-اق قىزعالداق گۇلىنىڭ جاڭا سۇرىپتارىن شىعارۋ باعىتىندا دا زەرتتەۋ جۇمىستارى جۇرگىزىلۋدە.
«ادىرنا» ۇلتتىق پورتالى
