جەتىسۋدا بەيسەن قۇرانبەك اتىنداعى سىنىپ اشىلدى

4255
Adyrna.kz Telegram

الماتى وبلىسىنداعى قىزىلجار اۋىلىندا ج.جاپاروۆ اتىنداعى ورتا مەكتەپتە بەلگىلى جۋرناليست، تەلەجۇرگىزۋشى بەيسەن قۇرانبەككە ارنالعان سىنىپ اشىلدى. سالتاناتتى جيىندا كەلگەن قوناقتار بەيسەن قۇرانبەككە ارنالعان كورمەنى ارالاپ تاماشالادى.

سىنىپتىڭ اشىلۋ قۇرمەتىنە وراي، اۋىل اقساقالى توقتاسىن راحمانبەكوۆ باتا بەرىپ، اق جاۋلىقتى انالار شاشۋ شاشتى. اۋدان اكىمى عالياسقار سارىباەۆ، بەيسەن ابايۇلىنىڭ سىنىپتاسى جاراس توقتاسىنۇلى مەن مەكتەپتىڭ وزات وقۋشىسى مەرۋەرت اداسحان مۇراجاي لەنتاسىن قيدى.

شارا بارىسىندا اۋدان اكىمى جۇرەكجاردى لەبىزىن ءبىلدىرىپ، بەيسەن ابايۇلىنىڭ وسىناۋ قاسيەتتى كۇرەڭبەل ءوڭىرىنىڭ قىزىلجار اۋىلىندا دۇنيەگە كەلىپ، وقىپ، ءبىلىم الىپ، قىسقا عانا عۇمىرىندا بيىك بەلەستەردى باعىندىرعان تىلگە تيەك ەتتى. وتىز جىل ءومىرىن وتاندىق  بۇقارالىق اقپارات قۇرالدارىنا قىزمەت ەتۋگە ارناعان ونىڭ «قازاقستان» ۇلتتىق ارناسىندا جۇرگىزگەن «ايتۋعا وڭاي»، «قارەكەت» باعدارلامالارىن كورەرمەننىڭ سۇيسىنە تاماشالاعانىن تەبىرەنە جەتكىزدى.

كەۋدەسىن قارا ولەڭ نارىنە تولتىرعان مەكتەپ وقۋشىلارى قارىمدى جۋرناليستكە ارناعان ولەڭدەرىن وقىدى.

پىكىرلەر