بەيبىتشىلىك جانە كەلىسىم سارايىندا قازاقستان حالقى اسسامبلەياسىنىڭ العىس ايتۋ كۇنىنە ارنالعان فورۋمى ءوتىپ جاتىر، دەپ حابارلايدى Baq.kz.
فورۋمعا مەملەكەتتىك حاتشى گۇلشارا ابدىقالىقوۆا، قحا توراعاسىنىڭ ورىنباسارى – حاتشىلىق مەڭگەرۋشىسى ەرالى توعجانوۆ مەملەكەت ورگاندارىنىڭ باسشىلارى، قحا مۇشەلەرى، ەتنومادەني بىرلەستىكتەردىڭ وكىلدەرى قاتىسۋدا.
ماڭىزدى جيىندا گۇلشارا ابدىقالىقوۆا ەلباسى نۇرسۇلتان نازارباەۆتىڭ العىس ايتۋ كۇنىنە ارنالعان قۇتتىقتاۋ ءسوزىن وقىپ بەردى.
«العىس ايتۋ كۇنى – بۇل ءبىزدىڭ مەملەكەتتىك جانە قوعامدىق كۇنتىزبەمىزدە جاقىندا عانا پايدا بولعان ەرەكشە كۇن. الايدا اتالعان جاس مەرەكەنىڭ تاريحي تامىرى تەرەڭدە جاتىر. ول مەيىرىمدىلىك، راقىمدىلىق، ءبىر-بىرىنە كومەك پەن ءوزىن-ءوزى قۇربان ەتۋ سىندى ادامنىڭ ەڭ اسىل قاسيەتتەرى كورىنىس تاپقان الماعايىپ زاماندى ەسكە سالادى.
العىس ايتۋ كۇنىن اتاپ وتە وتىرىپ، ءبىز، ءبىر جاعىنان، حالقىمىزدىڭ رۋحاني قاھارماندىعىنا قۇرمەت كورسەتىپ، وتكەنگە كوز جۇرگىتەمىز. ەكىنشى جاعىنان، ادامگەرشىلىكتىڭ نەگىزدەرى ارقىلى جول تارتىلعان بولاشاققا زور سەنىممەن قارايمىز.
ءبىز وتانىمىزدىڭ الەۋەتىن مەيلىنشە ەسەلەي تۇسۋگە كومەكتەسەتىن تابىستارىمىز بەن سىن-قاتەرلەرگە ريزاشىلىق بىلدىرەمىز»، - دەلىنگەن حاتتا.
سونىمەن قاتار ەلباسى قازاقستان حالقىنا العىس ايتىپ، ولاردى مەرەكەمەن قۇتتىقتادى.
«مەن تاۋەلسىز ەلىمىزدى بىرلەسىپ قۇرىپ جاتقان قازاقستان حالقىنا ىنتىماعى مەن ەرىك-جىگەرى ءۇشىن العىس ايتامىن. قايىرىمدىلىق پەن ءوزارا كومەك كورسەتۋ ءداستۇرىنىڭ ودان ءارى نىعايا تۇسەتىنىنە سەنىمدىمىن. العىس ايتۋ كۇنىمەن بارشاڭىزدى شىن جۇرەكتەن قۇتتىقتايمىن! بارلىقتارىڭىزعا باقىت، وتباسىلارىڭىزعا يگىلىك، دوستىق پەن ءوسىپ-وركەندەۋ تىلەيمىن»، - دەلىنگەن حاتتا.
"ادىرنا" كز
