مەملەكەت باسشىسى قاسىم-جومارت توقاەۆ كوروناۆيرۋس ينفەكتسياسىنا قارسى QazVac ۆاكتسيناسى ەلىمىزدىڭ وڭىرلەرىنە جەتكىزىلە باستاعانىن حابارلادى.
«بارلىق ازاماتقا قولجەتىمدى بولۋ ءۇشىن وتاندىق ەكپە ءوندىرىسىن ۇلعايتامىز. قازاقستان الەم بويىنشا ءوز ۆاكتسيناسىن شىعارعان بىرنەشە ەلدىڭ قاتارىندا. ەكپەنى ازىرلەگەن عالىمدار مەن مامانداردىڭ بارىنە العىس ايتامىن!»، - دەپ جازدى پرەزيدەنت الەۋمەتتىك جەلىدەگى پاراقشاسىندا.
ەسكەرەتىن جايت، بۇعان دەيىن COVID-19 تارالۋىنا جول بەرمەۋ جونىندەگى ۆەدومستۆوارالىق كوميسسيا قازاقستاندىق QazVac پرەپاراتىمەن ۆاكتسينالاۋ 26 ساۋىردە باستالاتىنىن حابارلاعان ەدى. QazVac ۆاكتسيناسىنىڭ العاشقى 50 مىڭ دوزاسى ءوندىرىلدى، مامىردا تاعى 50 مىڭ دوزا كولەمىندە شىعارىلادى.
"ادىرنا" ۇلتتىق پورتالى
