اتىراۋ وبلىسىنىڭ ءاربىر تۇرعىنى قازاقستاندىق ۆاكتسينانى الۋىنا بولادى. قازىر وتاندىق ەكپە قولدانىسقا شىقتى، دەپ حابارلايدى دەنساۋلىق ساقتاۋ باسقارماسىنىڭ ءباسپاسوز قىزمەتى.
بۇل تۋرالى اتىراۋ وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆ ايتتى. باسقارما باسشىسىنىڭ ايتۋىنشا، ەكى كومپونەنتتەن تۇراتىن QAZVAK ۆاكتسيناسىنىڭ العاشقى 2000 دوزاسى 25 ءساۋىر، جەكسەنبى كۇنى اتىراۋعا جەتكىزىلدى. بۇگىندە ۆاكتسينالار ەكى ەگۋ پۋنكتىنە - اتىراۋ قالاسىنىڭ 4 جانە 7 ەمحانالارىنا ءبولىنىپ تاراتىلدى.
-قازاقستاندىق QazCovid - in (QAZVAC) ۆاكتسيناسى – بۇل ەكى دوزالى ۆاكتسينا. ءبىر قۇتى ءبىر ادامعا ەسەپتەلگەن. سونىمەن قاتار، وتاندىق ۆاكتسينا مۇزداتۋدى قاجەت ەتپەيدى، پليۋس 2 - دەن 8 گرادۋسقا دەيىنگى تەمپەراتۋرادا ساقتالادى، - دەپ ءتۇسىندىردى اسحان بايدۋاليەۆ.
ەستەرىڭىزگە سالا كەتەيىك، قازاقستاندىق ۆاكتسينانىڭ العاشقى پارتياسى بيولوگيالىق قاۋىپسىزدىك پروبلەمالارىنىڭ عىلىمي-زەرتتەۋ ينستيتۋتى بازاسىندا 50 مىڭ دوزاسى شىعارىلدى جانە قازىردىڭ وزىندە قازاقستاننىڭ بارلىق وڭىرلەرىنە تاراتىلۋدا. بۇگىن QAZVAK ۆاكتسيناسىن ءبىرىنشى بولىپ قر دەنساۋلىق ساقتاۋ ءمينيسترى الەكسەي تسوي الدى.
