بيىلعى جىلدىڭ ايتۋلى وقيعالارىنىڭ ءبىرى استانادا وتەتىن «ەكسپو-2017» حالىقارالىق مامانداندىرىلعان كورمەسى ەكەندىگى بەلگىلى. وسى كورمە بارىسىندا شەت ەلدىك جانە وڭىرلىك قوناقتار ءۇشىن ەلىمىزدىڭ مادەنيەتىن تانىتاتىن كوپتەگەن شارالار وتەدى. سولاردىڭ ءبىرى دە بىرەگەيى م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ 18-26 ماۋسىم ارالىعىندا استانا وپەرا جانە بالەت تەاترى مەن استانا جاستار تەاترىندا ساحنالاناتىن قويىلىمدارى دەسەك، ارتىق ايتقاندىق ەمەس.
قازاق تەاترىنىڭ قارا شاڭىراعى گاسترولدىك ساپارى جونىندە باق وكىلدەرىمەن ءباسپاسوز ءماسليحاتىن وتكىزىپ، كورەرمەن نازارىنا ۇسىناتىن قويىلىمدارمەن تانىستىردى. وعان تەاتردىڭ ديرەكتورى ەرلان ءبىلال، ادەبيەت ءبولىمىنىڭ جەتەكشىسى ءاليا بوپەجانوۆا، رەجيسسەرلەر ەسمۇقان وباەۆ پەن الما كاكىشوۆالار قاتىستى. قويىلىمدار قازاق تىلىندە ءوتىپ، ورىس جانە اعىلشىن تىلدەرىنە اۋدارما جاسالىپ وتىرادى. تەاتر سۇيەر قاۋىم 18 ماۋسىمدا ع.مۇسىرەپوۆوۆتىڭ «ماحاببات داستانى» (رەج.ق.سۇگىربەكوۆ), 19 ماۋسىمدا ر.وتارباەۆتىڭ «سۇلتان بەيبارىس» ( رەج.يۋ.حانينگو-بەكنازار), 20 ماۋسىمدا م.اۋەزوۆتىڭ «اباي» (رەج.ە.وباەۆ), 21 ماۋسىمدا م.وماروۆانىڭ «كومبە ناننىڭ ءدامى» (رەج.ا.كاكىشوۆا), 22 ماۋسىمدا ع.ەسىمنىڭ «تاڭسۇلۋ» (رەج. ا.كاكىشوۆا), 23 ماۋسىمدا ع.مۇسىرەپوۆتىڭ «قىز جىبەك» (رەج.ە.نۇرسۇلتان), 24 ماۋسىمدا ع.مۇسىرەپوۆتىڭ «ماحاببات داستانى» (رەج.ق.سۇگىربەكوۆ), 25 ماۋسىمدا يران-عايىپتىڭ «قورقىتتىڭ كورى» (رەج. ي.ۆايتكۋس), 26 ماۋسىمدا ر.وتارباەۆتىڭ «بەيبارىس سۇلتان» ( رەج.يۋ.حانينگو-بەكنازار) سپەكتاكلدەرىن تاماشالاي الادى. بيلەت باعاسى دا حالىققا قول جەتىمدى بولماق (500-1500 تەڭگە).
جاسۇلان ناۋرىزاليەۆ
"ادىرنا". كز
