باياننىڭ باسى داۋعا قالدى: جۇرت جاپپاي ارىز جازىپ جاتىر

2098
Adyrna.kz Telegram

تەندەردەن پايدا تاباتىن مەكەمەنى بىرىگىپ قۇرعان تۋعان باۋىرى جاۋاپتان بەرۋدەن ات-تونىن الا قاشتى. ولاردىڭ ماقتاۋىن اسىرىپ، وزگەلەردى ينۆەستيتسيا قۇيۋعا پروديۋسەر بايان الاگوزوۆا شاقىرىپ جارنامالاعان. الدانعانىن ەندى تۇسىنگەن جۇرت جاپپاي پوليتسياعا ارىز جازىپ جاتىر، دەپ حابارلادى كتك.

"بۇل قازاقستانداعى تەندەرلىك جوبالارعا اقشا سالۋ ارقىلى ەش قاۋىپتەنبەي-اق اقشا تابۋعا بولاتىن جالعىز كومپانيا...".

بايان جارنامالاعان بۇل كومپانياعا جۇرت اعىلىپ كەلگەن. ال سول "استەكستىڭ" باسى-قاسىندا جۇرگەن – اعايىندى شىڭعىس پەن الماس قۇرمانعاليەۆتەر. تەندەردەن تەڭگە تابۋعا كومەكتەسىپ، ولاردىڭ كليەنتىن كوبەيتۋ ءۇشىن بۇل ىسكە "مۋدارابا كاپيتال" مەكەمەسى دەلدال رەتىندە تارتىلىپتى. ەندى ولاردىڭ ءوزى جۇرتپەن بىرگە الداندىق دەپ، ازىن جازعان.

ء"بىر اپتا بۇرىن "استەكس" كومپانياسىنىڭ ديرەكتورى الماس قۇرمانعاليەۆتىڭ اتىنا ارىز جازىپ، ءىس قوزعالدى. بۇل كومپانيانى 2019 جىلى الماس جانە شىڭعىس قۇرمانعاليەۆتەر قۇرعان. جارنامالارىن كورىپ قىزىقتىق. شىڭعىس تەندەرگە قاتىسۋعا وقىتادى. ال الماس تەندەردى ۇتۋعا كومەكتەسەدى. ءبىز اگەنت كومپانيا رەتىندە جۇمىسقا كىرىسىپ، ەندى الدانىپ قالىپ وتىرمىز", - دەيدى Mudarabah Capital كومپانياسىنىڭ باس ديرەكتورى رۋسلان بۋركانوۆ.

ولار تەندەردەن ۇتقان سومانىڭ 20 پايىزىن اراداعى اگەنت كومپانياعا بەرىپ وتىرادى. ال دەلدال مەكەمە ايىنا سالىمشىعا قۇيعان سوماسىنىڭ 7-8 پايىزىن اۋدارادى.

سالىمشىلار كەمى 5 ميلليون تەڭگەدەن قۇيۋعا ءتيىس بولعان. "مۋدارابانى" دا ەلدەگى تانىمال ۆاينەرلەر جارنامالاپ، ەل قۇلاعىن ەلەڭ ەتكىزدى. ەندى كەشىرىم سۇراسا تاڭعالماڭىز.

الدانعانداردىڭ ءبىرى – ارايلىم. جارىمەن كاسىپ باستاۋعا جيعان قارجىسىن "استەكستىڭ" ارانىنا تاستاعانىن كەش ۇققان.

"بلوگەرلەر جارناماسىن جاقسىلاپ بەرىپ جاتتى، ءبىز سولاي شەشتىك، ينۆەستيتسيا بەرەيىك دەدىك. ءبىز ەكى اي كۇتتىك. ەكى ايدان كەيىن تاعى بەرمەدى. بارىپ شارتتى بۇزدىق. بىراق سودان كەيىن ءوز اقشامىزدى الا الماي قالدىق. مىنە، بەس اي بولدى", - دەيدى ول.

ارايلىم سەكىلدى الدانعاندار 200-گە جۋىقتايدى. اينالىپ كەلگەندە 2 ميلليارد تەڭگەنى قالتاسىنا باسقان الماس قۇرمانعاليەۆ اگەنت مەكەمەنى دە، ولارعا سەنگەن سالىمشىلاردى دا سان سوقتىرىپ كەتكەن.

ال تۋعان باۋىرى شىڭعىس "بۇل بىلىققا قاتىسىم جوق" دەپ، وزىنە شاڭ جۋىتار ەمەس. ءتىپتى "اعاممەن ارازبىن، ارالاسپايمىن، ءوزى جاۋاپ بەرسىن" دەپ سۇراقتان سىتىلدى.

"بۇل كومپانيانى مەنىكى دەپ ەسەپتەگەنمىن. الماس "استەكس" برەندىن پايدالانىپ، "استەكس kz" دەپ اتاۋىن وزگەرتىپ، جۇمىسىن "مۋدارابا كاپيتالمەن"جۇرگىزدى. ەندى مەنى ارالاستىرماي، الماس پەن رۋسلان بۋركانوۆ سالىمشىلار الدىنداعى شارۋالارىن وزدەرى شەشسىن", - دەيدى شىڭعىس قۇرمانعاليەۆ.

ءبىر قىزىعى، "اعاممەن ارازبىن" دەگەنمەن، شىڭعىس پەن الماس قۇرمانعاليەۆتىڭ كەڭسەسى ءبىر عيماراتتا. ەكەۋى دە وسىعان دەيىن ءىستى بولعان. الماس قۇرمانعاليەۆ 2010 جىلى مونوپولياعا قارسى ينسپەكتسيادا جۇمىس ىستەپ ءجۇرىپ، 5 مىڭ دوللار پارا العانى ءۇشىن سوتتالسا، شىڭعىس سول جىلدارى قارجى پوليتسياسىنىڭ قىزمەتكەرى بولا تۇرا، زاڭسىز ويىن بيزنەسىن ۇيىمداستىرعانى ءۇشىن جازا ارقالاعان.

ايىبىن وتەگەن سوڭ اياقاستى تەندەرگە بەت بۇرعان اعايىندىلار ول كەزەڭدى نە راستاعىسى، نە جوققا شىعارعىسى كەلمەيدى.

ال پوليتسيا دەپارتامەنتى كۇماندى كومپانياعا قاتىستى تەكسەرىستى سالىمشىلار ارىزىنىڭ نەگىزىندە باستاپ كەتتى.

"قازىر ءمان-جايىن انىقتاۋعا جانە كىنالىلەردى جاۋاپقا تارتۋعا باعىتتالعان تەرگەۋ ءىس-شاراسى جۇرگىزىلۋدە", - دەپ ءتۇسىندىردى الماتى قالاسى پد رەسمي وكىلى سالتانات ازىربەك.

اتالمىش ىستەگى كۇدىكتىلەردىڭ ءتىزىمى كوبەيۋى مۇمكىن. الماس قۇرمانعاليەۆكە كومەكتەسكەندەردىڭ اراسىندا تيمۋر وسپانوۆ دەگەن كەڭەسشىسىنىڭ اتى اتالادى. ول جاعىن تەرگەۋ ناقتىلايدى. ارىز تۇسكەنمەن، نەگە ەكەنى بەلگىسىز، ۇشتى- كۇيلى جوعالعان الماس قۇرمانعاليەۆكە ءالى ىزدەۋ جاريالانبادى.

بەيرەسمي دەرەك بويىنشا، ول ميللياردتارىمەن گرۋزياعا كەتىپ قالعان.

پىكىرلەر