قازاقستاندا كوروناۆيرۋسقا قارسى ەگىلگەندەردىڭ سانى جاڭاشا ەسەپتەلە باستايدى. دەنساۋلىق ساقتاۋ ءمينيسترى الەكسەي تسويدان جاڭاشا ەسەپتەۋدە ۆاكتسينانىڭ ەكى كومپونەنتىمەن ەگىلگەن ازاماتتاردى عانا ەسكەرۋدى سۇرادى، دەپ حابارلايدى "ادىرنا" ۇلتتىق پورتالى.
ءماجىلىستىڭ جالپى وتىرىسىندا ۆاكتسيناتسيانىڭ جىلدامدىعى تۋرالى ماسەلەنى دەپۋتات لاريسا پاۆلوۆەتس كوتەردى.
"19 قاڭتاردا وتكەن ۇكىمەت وتىرىسىندا ءسىز جانە پرەمەر-ءمينيستردىڭ ورىنباسارى ەرالى توعجانوۆ ەكەۋىڭىز ءبىرىنشى جارتىجىلدىقتا 2 ميلليون ادامعا ۆاكتسينا ەگىلەتىنىن، ال جىلدىڭ سوڭىنا دەيىن 6 ميلليون ادامعا ۆاكتسينا ەگۋ جوسپارلانىپ وتىرعانىن مالىمدەدىڭىزدەر. بىراق 4 مامىرداعى جاعداي بويىنشا 1 422 204 ادام ءبىرىنشى كومپونەنتپەن، 347 774 ادام ەكىنشى كومپونەنتپەن ەگىلدى. مەن نەگە بۇل تۋرالى ايتىپ وتىرمىن؟ سەبەبى مەن دارىگەر رەتىندە ۆاكتسينانىڭ ەكى دوزاسىن العان ادام عانا ۆاكتسيناتسيالانعان بولىپ سانالاتىنىن ايتامىن، باسقا جاعدايلار ەسەپتەلمەيدى. سوندىقتان، ەكىنشى كومپونەنتتەگى - 347 474 ادامدى قامتۋعا سۇيەنە وتىرىپ، جىل سوڭىنا دەيىن 6 ميلليون ادامعا ۆاكتسينا ەگىلەتىنىنە سەنىمدىلىك جوق. الەكسەي ۆلاديميروۆيچ، ۆاكتسيناتسيا جىلدامدىعىن ارتتىرۋ ءۇشىن مينيسترلىك قانداي شارالار قابىلداۋدا؟" - دەپ سۇرادى دەنساۋلىق ساقتاۋ ءمينيسترىنىڭ ماجىلىسۆۋمەنى.
سۇراققا جاۋاپ بەرە وتىرىپ، الەكسەي تسوي ۆاكتسينانىڭ ءبىرىنشى كومپونەنتىنەن كەيىن ادامدا ۆيرۋسقا قارسى انتيدەنەلەر پايدا بولاتىنىن اتاپ ءوتتى.
"ەكىنشى كومپونەنت مىندەتتى تۇردە بىرىنشىسىنە ەرەدى. ياعني، ازاماتتار ءبىرىنشى كومپونەنتتى العان سوڭ، ەكىنشى كومپونەنتكە 21 كۇننەن كەيىن نەمەسە ەڭ كوبى 45 كۇننەن كەيىن جەتەدى. قالاي بولعاندا دا، ءبىزدىڭ ازاماتتار ەكىنشى كومپونەنتتى الادى. ءبىرىنشى كومپونەنتپەن ۆاكتسيناتسيالانعاننان كەيىن دە انتيدەنەلەر 15-ءشى كۇنى پايدا بولاتىندىعىن ءتۇسىنۋ كەرەك. تيىسىنشە، قازىر بىزدە ۆاكتسينا بار، جەتكىزىلىم كەستەسى ناقتى. كۇن سايىن، ماسەلەن كەشە بىزدە 117 مىڭ ازامات ۆاكتسينا الدى. ياعني، قارقىن ارتىپ كەلەدى", دەدى دەنساۋلىق ساقتاۋ مينيسترلىگىنىڭ باسشىسى.
بىراق بۇل جاۋاپ دەپۋتاتتى قاناعاتتاندىرمادى، وسىعان بايلانىستى لاريسا پاۆلوۆەتس ۆاكتسينانىڭ ءبىر كومپونەنتىمەن ۆاكتسيناتسيالانعان ادام تولىق ەگىلگەن دەپ سانالاتىندىعىن ءتۇسىندىرۋدى سۇرادى.
"ەگەر ەكى دوزالى ۆاكتسينا بولسا، ۆاكتسيناتسيانىڭ تولىق كۋرسى قاجەت. بىزگە مىندەتتى تۇردە ەكى ۆاكتسينا جاساۋ كەرەك", - دەپ ءتۇسىندىردى مينيستر.
ياعني، ەكى دوزانى دا العان ادامدى، تولىق ۆاكتسيناتسيالانعان ادام دەپ قاراستىرا الامىز. ايتىڭىزشى، ەكىنشى كومپونەنتتى ەلدە بىزدەن قانشا ادام الدى؟ - دەدى ءماجىلىس سپيكەرى نۇرلان نىعماتۋلين.
الەكسەي تسوي 400 مىڭ قازاقستاندىق ەكىنشى كومپونەنت الدى دەپ جاۋاپ بەردى.بۇگىندە 400 مىڭ. سوندىقتان، ءسىز ورتالىق كوممۋنيكاتسيالار قىزمەتىنە بارعاندا، جۋرناليستەرمەن، تۇرعىندارمەن كەزدەسكەندە، بار ساندار تۋرالى ناقتى مالىمەت بەرىڭىز، جاراي ما؟ايتپەسە بۇل ساندار شاتاسىپ بارادى. ءسىز 21 كۇن دەدىڭىز، ءبىر ورىنباسارىڭىز شىعىپ 90 كۇن دەپ ايتتى. ەندى تاعى ەڭ كوپ دەگەندە 45 كۇن دەدىك. بىراق ءبىز ءبارىن تولىعىمەن شاتاستىردىق. ءبىز حالىقارالىق ستاندارت شەڭبەرىندە جۇرەمىز، الەكسەي ۆلاديميروۆيچ، سولاي ما؟ ءسىزدىڭ ديپلومدارىڭىزعا قاراساق، سىزدەر دەنساۋلىق ساقتاۋدى ۇيىمداستىرۋشىسىزدار، باسقالارى دا- سوندىقتان ۆاكتسيناتسيانى ۇيىمداستىرىڭىزدار. سەبەبى ءبىر اقپارات شىعادى، سودان كەيىن باسقا قىزمەتكەر تاعى شىعادى جانە مۇلدەم باسقا اقپارات بەرەدى، ءۇشىنشىسى - جالپى، وعان باسقا جاعىنان قارايدى. ال تۇرعىندار مۇنى تۇسىنبەيدى، - دەدى ءماجىلىس توراعاسى.
ول ۆاكتسيناتسياعا جەتكىلىكتى قاراجات بولىنگەنىن، تەك ناۋقاندى دۇرىس ۇيىمداستىرۋ قاجەت ەكەنىن قوستى.
"بۇگىنگى كۇنگە دەيىن 400 مىڭ، ءسىز ءوزىڭىز راستادىڭىز. حالىقتىڭ باسىن قاتىرمايىق. ەكى ۆاكتسيناتسيا، ياعني ەكى ۆاكتسينا الۋ كەرەك. الەكسەي ۆلاديميروۆيچ، ءسىز كەلىسەسىز بە؟ بۇگىن نەمەنە بارلىق مينيسترلەردىڭ داۋىستارى جوعالىپ كەتكەن بە؟ ءسىز كەلىسەسىز بە؟" دەپ سۇرادى نىعماتۋلين.
-يا، - دەپ جاۋاپ بەردى الەكسەي تسوي.
"ادىرنا" ۇلتتىق پورتالى
