قازاقستان قىزىلشا اۋرۋىنىڭ تارالۋى جاعىنان الەم بويىنشا ءبىرىنشى ورىنعا شىقتى. بۇل تۋرالى دەنساۋلىق ساقتاۋ ءمينيسترى اقمارال ءالنازاروۆا مالىمدەدى، دەپ حابارلايدى ”ادىرنا” ۇلتتىق پورتالى.
مالىمەت بويىنشا، قىزىلشانى ۆاكتسينامەن توقتاتۋعا بولادى. بىراق بۇگىندە قازاقستاندا ۆاكتسينامەن باسقارىلاتىن ينفەكتسيالىق اۋرۋلاردى ەپيدەميولوگيالىق باقىلاۋ جاعىنان جۇيەلى كەمشىلىكتەر بار.
وسى ورايدا ءالنازاروۆا ينفەكتسيالىق اۋرۋلاردى بولجامداۋ جانە باقىلاۋ جۇيەسىن كۇشەيتۋ ءۇشىن بىرقاتار شارالاردى اتقارۋ قاجەت دەپ سانايدى.
“ناقتى ۋاقىت فورماتىندا تەمپەراتۋرالىق رەجيمدى باقىلاۋ مۇمكىندىگىمەن پروفيلاكتيكالىق ەگۋلەر مەن ۆاكتسينالار قوزعالىسىن ەسەپكە الۋدى تسيفرلاندىرۋدى قامتاماسىز ەتۋ، دەنساۋلىق ساقتاۋدىڭ بارلىق دەڭگەيلەرىندە مەديتسينا قىزمەتكەرلەرىن وقىتۋدى جولعا قويۋ، مۇددەلى ورگاندارمەن جانە ۆەدومستۆولارمەن بىرلەسىپ باسقارىلاتىن ينفەكتسيالاردىڭ پروفيلاكتيكاسىندا ۆاكتسيناتسيالاۋدىڭ ماڭىزدىلىعى تۋرالى حالىقتى كەڭىنەن حاباردار ەتۋدى قامتاماسىز ەتۋ قاجەت دەپ سانايمىن”، - دەدى ءالنازاروۆا مينيسترلىكتىڭ كەڭەيتىلگەن القا ماجىلىسىندە.
