تۇركىستان وبلىسىنىڭ پوليتسەيلەرى تەرەڭدىگى ءتورت مەتر بولاتىن كارىز قۇدىعىنا ءتۇسىپ كەتكەن ەكى تۇرعىندى امان الىپ قالدى، دەپ حابارلايدى "ادىرنا" ءتىلشىسى Polisia.kz-كە سىلتەمە جاساپ.
ارىس اۋداندىق پوليتسيا ءبولىمىنىڭ كەزەكشى بولىمىنە جەرگىلىكتى تۇرعىننىڭ ءبىرى حابارلاسىپ، كومەككە شاقىرعان. ايەلدىڭ ايتۋىنشا، اقىنبەكوۆ كوشەسى بويىنداعى كاناليزاتسيانى تازالاۋعا قۇدىققا تۇسكەن قىزمەتكەرلەر شىعا الماي، ومىرىنە قاۋىپ تونگەن. حابارلامانى الىسىمەن سول اۋماققا بەكىتىلگەن ۋچاسكەلىك پوليتسيا ينسپەكتورى باقىتجان جاقسىلىق پەن ونىڭ ارىپتەسى اسانحان سىزدىقوۆ ەكەۋى شۇعىل ارەكەت ەتىپ، 2-3 مينۋت ىشىندە جەتى كوشە ارىداعى وقيعا ورنىنا جەتكەن.
"پوليتسەيلەر كەلگەندە تازالىقشى قىزمەتكەرلەر قۇلاپ كەتكەن كارىز قۇدىعىنىڭ اينالاسىندا بىرنەشە تۇرعىندار قاۋمالاپ كومەكتەسپەك بولىپ تۇرادى. سودان بىردەن قىزمەتتەرىنە كىرىسكەن ءتارتىپ ساقشىلارى، تۇرعىندارمەن بىرگە ءتورت مەترگە جۋىق تەرەڭدىككە قۇلاعاننىڭ ءبىرىن جىپپەن تارتۋ ارقىلى نەبارى بەس مينۋتقا جەتەر جەتپەس ۋاقىتتا شىعارىپ الادى. سودان كارىزدەگى يىستەن ۋلانعان تۇرعىندار جەدەل جاردەمدەگى دارىگەرلەرگە تاپسىرىلىپ، اۋرۋحاناعا جەتكىزىلەدى. بۇل جاعدايدىڭ بارلىعى پوليتسەيدىڭ بەينەجەتونىنا تۇسىرىلگەن",- دەلىنگەن حابارلامادا.
بەلگىلى بولعانداي، كارىز (كاناليزاتسيا) تازالاۋعا جۇمىسقا كەلگەن قىزمەتكەرلەر تومەنگە تۇسكەندەرىندە بەلدەرىندەگى ءجىپ ءۇزىلىپ كەتكەن. ءبىرى قۇدىقتىڭ بەتكى جاعىندا ءىلىنىپ قالسا، ەكىنشىسى تەرەڭىنە بارىپ بىراق قۇلاعان. ابىروي بولعاندا، بۇگىندە جانساقتاۋ بولىمىنە تۇسكەن ەكى قىزمەتكەردىڭ دە جاعدايى جاقسى.
"ادىرنا" ۇلتتىق پورتالى
