قر پرەمەر-ءمينيسترى اسقار مامين شىعىس قازاقستان وبلىسىنا جۇمىس ساپارى اياسىندا ريددەر قالاسىنا باردى. ۇكىمەت باسشىسى بيىل 10 مامىردا ءورت سالدارىنان زارداپ شەككەن قالا تۇرعىندارىمەن كەزدەسۋ وتكىزىپ، زارداپ شەككەندەرگە ارنالعان تۇرعىن ءۇي قۇرىلىسى جۇمىستارىنىڭ بارىسىن تەكسەردى، دەپ حابارلايدى «ادىرنا» ءتىلشىسى رەسمي اقپاراتتىق رەسۋرسقا سىلتەمە جاساپ.
«مەملەكەت باسشىسى قاسىم-جومارت توقاەۆتىڭ تاپسىرماسى بويىنشا ريددەر قالاسىندا بولعان ورتتەن زارداپ شەككەن بارلىق وتباسى جاقىن ارادا جاڭا تۇرعىن ۇيمەن قامتاماسىز ەتىلەدى. ۇكىمەت پەن شىعىس قازاقستان وبلىسىنىڭ اكىمدىگى مەملەكەت باسشىسىنىڭ تاپسىرمالارىن جۇزەگە اسىرۋ ءۇشىن بارلىق قاجەتتى شارالاردى قابىلدادى»، — دەدى ا. مامين.
ورتتەن زارداپ شەككەن وتباسىلارعا ارنالعان 30 جاڭا تۇرعىن ءۇيدىڭ قۇرىلىسى توتەنشە جاعدايلار سالدارىن جويۋ ءۇشىن قاراستىرىلعان ۇكىمەت رەزەرۆىنىڭ قاراجاتى ەسەبىنەن جاڭا «بوتانيكا ءۇشىنشى تۇرعىن ءۇي اۋدانىندا» جۇرگىزىلۋدە. ءار ءۇيدىڭ اۋدانى – 80 شارشى مەتر، ال ءۇي ماڭىنداعى جەكە ۋچاسكە كولەمى – 10 سوتىق.
ايتا كەتەيىك، ريددەر قالاسىندا بولعان ءورت سالدارىن جويۋ ءۇشىن 557,5 ملن تەڭگە ءبولىندى. قۇرىلىس جۇمىستارىن «وبلشىعىسجول»، «VK Invest Company»، «QK Sunqar»، «ۆوستوكۆزرىۆپروم»، «Kazprofstroy Holding» كومپانيالارى جۇرگىزۋدە.
«ادىرنا» ۇلتتىق پورتالى
