بۇگىن مەملەكەت باسشىسى قاسىم–جومارت توقاەۆ اۋىل اكىمىن سايلاۋ جونىندە، جالپى اكىمدەر تۋرالى جاڭا زاڭعا قول قويعان بولاتىن. وسى تاقىرىپقا قاتىستى ساياساتتانۋشى، ۇلتتىق كەڭەستىڭ مۇشەسى تالعات قاليەۆتىڭ پىكىرىن بىلدىك.
«بۇل – وتە ماڭىزدى وزگەرىس. ويتكەنى ۇلتتىق كەڭەستىڭ وتىرىستارىندا وسى اكىمدەردى سايلاۋ تۋرالى زاڭدى قولداعان ەدىم. بۇل زاڭدى ماڭىزدى دەۋگە سەبەپ كوپ. مىسالى جەرگىلىكتى تۇرعىندار ءماجىلىس دەپۋتاتتارىن، پرەزيدەنتتى سايلاعاندا سايلاۋدىڭ ناتيجەسىن كورمەيدى. ويتكەنى ول تەز بايقالاتىن قۇبىلىس ەمەس»، - دەيدى ساياساتتانۋشى.
سونىمەن قاتار قاليەۆ اكىمدەر سايلاۋىنان باستاپ پرەزيدەنت سايلاۋىنا دەيىنگى ارالىقتاعى ورتاق قۇبىلىس تۋرالى ءسوز قوزعادى.
«پرەزيدەنت سايلاۋى – ماڭىزدى ساياسي ءۇردىس. ونىڭ ەرەجەسىنە سايكەس جەرگىلىكتى حالىق ساياساتكەردى تاڭدايدى. ول ۇزاق مەرزىمدە بيلىكتە بولادى. قاراپايىم سايلاۋشى ادام بۇل سايلاۋدىڭ ناتيجەسىمەن بىردەن تانىس بولمايدى. ءدال وسىلاي ءبىز دەپۋتاتتاردى دا تاڭدايمىز. سونداي-اق ءبىز ولاردىڭ قالاي زاڭ قابىلدايتىنىن، ول زاڭنىڭ بىزگە قالاي اسەر ەتەتىنىن بىلمەيمىز. كەيىن وسى زاڭدار باسىمىزعا تۇسكەن كەزدە ءوزىمىزدىڭ وسى دەپۋتاتتاردى سايلاعانىمىزدى ۇمىتىپ كەتىپ جاتامىز» - دەيدى ول.
ايتا كەتەيىك، وسى سۇحبات بارىسىندا ساياساتتانۋشى اۋىل اكىمدەرىن سايلاۋ تۋرالى، ونىڭ ىشىندە پارتيالارعا وسى سايلاۋدىڭ قالاي اسەر ەتەتىنىن ەرەكشە اتاپ ءوتتى.
«ال اۋىل اكىمدەرىن سايلاۋ تۋرالى ايتاتىن بولسام، اكىمدى سايلاعاننان كەيىن حالىق ناتيجەلەردى بىردەن كورەتىن بولادى. بارلىق رەيتينگ كورسەتىلىپ وتىرادى. بەلگىلى ءبىر اۋىلدىڭ اكىمى شارۋاقور بولۋى مۇمكىن. ول مەكتەپكە جوندەۋ جۇمىستارىن جۇرگىزىپ، جولدى جوندەپ، كوشەلەردى دامىتاتىن شىعار. ال باسقا اۋىل تۇرعىندارى اكىمدەرىن سايلاعاندا قاتەلەسۋى ابدەن مۇمكىن. سولاي ناتيجەلەر كورسەتىلىپ تۇرادى. «كورشى اۋىل تۇرعىندارى قالاي ءومىر ءسۇرىپ جاتىر؟»، «ولاردىڭ وزدەرى قالاي ءومىر ءسۇرىپ جاتىر؟» دەگەن سۇراقتارعا ءاربىر سايلاۋشى وزىنشە جاۋاپ بەرىپ، كەلەسى سايلاۋعا جاۋاپكەرشىلىكپەن قارايدى.
حالىق سولاي ءاربىر ادامنىڭ داۋىسىنىڭ ۇكىمەتكە قالاي اسەر ەتەتىنىن جانە ولار ءۇشىن ءاربىر داۋىستىڭ ماڭىزدى ەكەنىن تۇسىنەدى. سونىمەن قاتار وسى اكىمدەردى سايلاۋ تۋرالى زاڭ پارتيالاردىڭ العا جىلجۋىنا كومەكتەسەدى، اكىمدەر پارتيالاردىڭ تانىلۋىنا سەپتىگىن تيگىزەدى. قازىرگى كەزدە وتاندىق ساياسي ارەنادا Nur Otan پارتياسى سەكىلدى فيليالى كوپ دامىعان پارتيالار جوقتىڭ قاسى. ال ەگەر پارتيالار ءوز فيليالدارىن ءار ايماقتا اشاتىن بولسا، اۋىل اكىمدەرى سول فيليالداردىڭ وكىلى بولا الادى. پارتيالار وزدەرىن اكىمدەردىڭ ارقاسىندا تانىتار بولسا، كەلەسى پارلامەنت سايلاۋىنا مىقتى قولداۋمەن قاتىسادى. وعان قوسا پارتيالاردىڭ وكىلى بولۋ ارقىلى اكىم ءوزىنىڭ العا قاراي جىلجۋىنا ىقپال ەتەدى»، - دەيدى قاليەۆ.
سونداي-اق ول ءسوزىن جاس اكىمدەرگە دەگەن جىلى لەبىزىمەن اياقتادى.
«بۇل ناقتى جۇمىس جاسايتىن پوليتيكالىق ۆەرتيكال بولا الادى. اۋىل اكىمدەرىن ساۋلاۋ تۇبىندە پوليتيكالىق لاندشافتتى ساپالى تۇردە وزگەرتەدى. سايلاۋ اشىق تۇردە بولاتىندىقتان، ۇمىتكەرلەر اۋىل تۇرعىندارىمەن بەلسەندى تۇردە قارىم-قاتىناس جاساۋى كەرەك.
قورىتىندىلاي كەلە بۇگىنگى اۋىل اكىمدەرى بولاشاقتا ۇلتتىق ماسشتابتا وتە تانىمال ساياساتكەر بولا الادى. ارينە، بارلىعى ەمەس. الايدا كەيبىرى وسى مۇمكىندىكتى قولدانا الادى. قازىرگى امبيتسياسى مول، كرەاتيۆتى ويلايتىن، جەڭىستى قولدان بەرمەيتىن جاستار ءوزىنىڭ رەپۋتاتسياسىنا جانە پەرسپەكتيۆاسىنا جۇمىس جاسايدى دەپ، سونداي-اق پوليتيكالىق كارەراسىن جاسايدى دەپ سەنەمىن»، - دەدى ول.
"ادىرنا" ۇلتتىق پورتالى
