سەگىز التىن: قازاقستاندىق بوكسشى قىزدار رەكورد ورناتتى

6898
Adyrna.kz Telegram

دۋبايدا بوكستان ازيا چەمپيوناتىنىڭ العاشقى فينالدىق باسەكەلەرى مارەگە جەتتى. ايەلدەر اراسىنداعى سىندا قازاقستان كومانداسى سەگىز التىن يەلەنىپ، جالپى ەسەپتە كوش باستادى، دەپ حابارلايدى «ادىرنا» ءتىلشىسى Olympic.kz-كە سىلتەمە جاساپ.

ەرىك العابەك جاتتىقتىراتىن قازاقستاندىق بوكسشى قىزدار ازيا بىرىنشىلىگىن 8 التىن، 1 كۇمىس جانە 1 قولا مەدالمەن اياقتاپ وتىر. ءبىزدىڭ كوماندا ساپىنان الۋا بالقىبەكوۆا (48 كەلى), نازىم قىزايباي (51 كەلى), دينا جولامان (54 كەلى), ريمما ۆولوسەنكو (60 كەلى), ميلانا سافرونوۆا (64 كەلى), ۆالەنتينا حالزوۆا (69 كەلى), فاريزا شولتاي (81 كەلى) جانە ءلاززات كۇنگەيباەۆا (+81 كەلى) چەمپيون اتاندى.

ۆلاديسلاۆا كۋحتا (57 كەلى) اقتىق سىندا ءسۇرىنىپ، كۇمىس جۇلدەگەر اتانسا، مارينا ۆولنوۆا (75 كەلى) قۇرلىق دوداسىنىڭ قولا مەدالىن تاعىندى. بۇل بوكستان قازاقستان ايەلدەر كومانداسىنىڭ رەكوردتى كورسەتكىشتەرىنىڭ ءبىرى. بۇعان دەيىن قازاقستاندىقتار ازيا بىرىنشىلىگىنەن سەگىز التىن الماعان بولاتىن.

ەرتەڭ ەرلەر اراسىنداعى فينالدىق جەكپە-جەكتەر وتەدى. اقتىق ايقاستا قازاقستان كومانداسىنىڭ بەس وكىلى باق سىنايدى.

«ادىرنا» ۇلتتىق پورتالى

پىكىرلەر