قىمباتتى مەنىڭ جاس دوستارىم!
الدىمەن، بارشاڭىزدى 1 ماۋسىم – حالىقارالىق بالالاردى قورعاۋ كۇنىمەن قۇتتىقتايمىن!
شىمكەنت جاستار ليگاسىنىڭ سالتاناتتى ءىس-شاراسى جاسامپازدىققا تولى جىلدار، ياعني تاۋەلسىزدىگىمىزدىڭ 30 جىلدىعىمەرەيتويىنىڭ اياسىندا ءوتىپ جاتىر. تاۋەلسىز مەملەكەتتىڭ قالىپتاسۋى مەن دامۋىندا تۇڭعىش پرەزيدەنتىمىز – ەلباسى ن.ءا. نازارباەۆتىڭ ءرولى ەرەكشە.
مەملەكەت باسشىسى قاسىم-جومارت توقاەۆ قازاقستان حالقىنا جولداۋىندا بۇقارالىق سپورتتى دامىتۋعا قاتىستى تاپسىرماسىنا سايكەس، قالا جاستارىنىڭ باستاماسىمەن ەلىمىزدە العاش رەت «شىمكەنت جاستار ليگاسى» جوباسى ىسكە اسىرىلۋدا.
بالالاردى قۋانتۋ، كوڭىلىن تاۋىپ، جۇزدەرىنە كۇلكى سىيلاۋ – زور باقىت! وسى ورايدا، بالالارعا ساپالى ءبىلىم، سانالى تاربيە بەرۋ جولىندا قاجىرلى ەڭبەك ەتىپ جۇرگەن ۇستازدارعا، اتا-انالارعا العىس بىلدىرەمىن.
ازاتتىقتىڭ العاشقى جىلدارى قالامىزداعى ءبىلىم بەرۋ ۇيىمدارىنىڭ سانى 125- ءتى قۇراسا، بۇل كۇندە 780-گە جەتتى.
بۇل ناتيجەگە قول جەتكىزۋدە مەملەكەتىمىز اۋقىمدى باعدارلامار قابىلداپ، ادامي كاپيتالدى دامىتۋدا وسكەلەڭ ۇرپاقتىڭ ساپالى ءبىلىم الۋىنا باسىمدىق بەرۋدە.
وعان دالەل، 30 جىلدا 68 مىڭنان استام ورىنعا 98 زاماناۋي ۇلگىدەگى ءبىلىم وشاعى سالىنىپ، 85%-نا كۇردەلى جوندەۋجۇمىستارى جۇرگىزىلىپ ءۇش اۋىسىمدى، اپاتتى مەكتەپتەردىڭ وزەكتى ماسەلەلەرى وڭ شەشىمىن تابۋدا.
وسى جىلدارى دارىندى بالالارعا ارنالعان ءۇش تىلدە وقىتاتىن مەكتەپتەر، نازارباەۆ زياتكەرلىك مەكتەپتەر جەلىسى قۇرىلىپ، وقۋشىلار حالىقارالىق زەرتتەۋلەرگە قاتىسىپ، بىلىمدەرىن جەتىلدىرۋدە.
سونىمەن قاتار، قالاداعى بارلىق بالالار الاڭى جاڭارتىلىپ، زاماناۋي سپورت الاڭدارى بوي كوتەرەدى. ءسوز ورايى كەلگەندە ايتا كەتەيىن، شىمكەنت قالاسى بويىنشا سپورتتىق سەكتسيالارعا جازىلعان وقۋشىلار سانى – 172 496-عا جەتتى.
مۇنىڭ ءبارى – جاستاردىڭ ساپالى ءبىلىم الۋى مەن سالاۋاتتى ءومىر سالتىن قالىپتاستىرۋدا ۇكىمەتىمىزدىڭ قامقورلىعى ياعني، تاۋەلسىزدىكتىڭ تولاعاي تابىسى دەپ بىلەمىن.
دارىندى بالالاردى انىقتاۋ مەن قولداۋدا ماڭىزدى ءىس-شارالار جۇرگىزىلۋدە. بيىلعى وقۋ جىلىندا وقۋشىلارىمىز ءبىلىم، سپورت سايىستارىندا ءوز ۇلەستەرىن قوسىپ، قالامىزدىڭ ابىرويىن اسقاقتاتتى.
وعان دالەل، قالامىزدىڭ 131 وقۋشىسى ەلباسى مەدالىنىڭ يەگەرى اتاندى، ءتۇرلى حالىقارالىق، رەسپۋبليكالىق وليمپيادالار مەن عىلىمي جوبالاردان رەسپۋبليكادا 69 وقۋشى جەڭىس تۇعىرىنان كورىندى.
رەسپۋبليكالىق ۇلتتىق مەكتەپ ليگاسىندا سپورتتىڭ 4 تۇرىنەن ياعني، ۆوللەيبول، فۋتبول، ۇستەل تەننيسى، فۋتزالدان شىمكەنتتىك 9 كوماندا چەمپيون اتاندى.
حالىقارالىق ونەر، قىلقالام شەبەرلەرى سايىستارىنان 110 ونەرپاز باس جۇلدەلەرگە يە بولدى.
ونەرى ورگە جۇزگەن ورەسى بيىك ورەندەرىمىزدىڭ اسۋلى شىڭدارعا شىعىپ، حالىقارالىق، رەسپۋبليكالىق كەزەڭدە ءوز باعىن سىناپ قانا قويماي، قالامىزدىڭ ابىرويىن اسقاقتاتىپ وتىرعانى - ءبىز ءۇشىن ماقتانىش!
ءبىز بۇگىن سىزدەرگە كوتەرىڭكى كوڭىل-كۇي سىيلاۋ ءۇشىن «شىمكەنت جاستار ليگاسىنىنىڭ» جابىلۋ ءراسىمىن بالالاردى قورعاۋ كۇنى مەرەكەسىمەن ورايلاستىرىپ، ۇيىمداستىرىپ وتىرمىز.
قالا جاستارى باستاماسىمەن ىسكە اسقان بۇل ليگانى وتە اۋقىمدى ءارى ءساتتى جوبالاردىڭ ءبىرى دەپ ەسەپتەيمىن.
نامىستى دودا قانشاما جاسقا جول سىلتەپ، رۋحىن شىڭدادى. ونىڭ ايعاعى ليگاعا قاتىسۋعا 140 ءبىلىم ۇيىمىنان 536 كوماندادان ءوتىنىش ءتۇسىپ، جالپى سانى 8 569 وقۋشى سايىسقا ءتۇستى.
ەندەشە قۋانسا بالا قۋانسىن! جەڭىستەن جەڭىسكە، قاي سالادا دا جەتىستىككە جەتە بەرىڭىزدەر! سپورتقا بەيىم، ءبىلىمدى، سانالى بولىڭىزدار!
جازعى دەمالىستارىڭىز كوڭىلدى، ءساتتى ءوتسىن!
