قازاقستان حالىق پارتياسى ەل ۇكىمەتىنە "مەملەكەت حالىقتىڭ كوز جاسىن ەستىپ، كورۋى ءۇشىن" ەستۋ اپپاراتى مەن كوزىلدىرىك سىيلايدى، - دەپ حابارلايدى "ادىرنا" ۇلتتىق پورتالى Tengrinews.kz سايتىنا سىلتەمە جاساپ.
"بۇگىندە ۇكىمەتكە كوپ نارسە ىستەۋ كەرەك. وعان اقشا بولىنەدى. الايدا ماسەلەلەر مەن پروبلەمالار شەشىلمەيدى. ادامدار ايعايلايدى، جىلايدى، حات جازادى - جاۋاپ جوق. كەشىرىڭىز، مىرزالار (ۇكىمەتتەگى), جەرگە تۇسىڭىزدەر. ءبىزدى ەستيتىن مەملەكەت قايدا؟ نەگە مۇلدەم ەلەمەيسىزدەر... ءبىز پارتيادان شەنەۋنىكتەرگە ەستۋ اپپاراتىن سىيعا تارتقىمىز كەلەدى. كوزىلدىرىك - ولار كورۋى ءۇشىن. كورگەن جانە ەستىگەن نارسەلەردەن ولاردىڭ جۇرەگى توقتاپ قالۋى ءۇشىن - ۆاليدول", - دەدى قحپ وكىلى، ءماجىلىس دەپۋتاتى ايبەك پاياەۆ پارتيانىڭ كەزەكتەن تىس سەزىندە.
ەسكە سالايىق، ايبەك پاياەۆ شەنەۋنىكتەردى كەرى بايلانىس جوق دەپ سىنعا العان بولاتىن. 2021 جىلدىڭ قاڭتارىندا قازاقستان حالىق پارتياسى فراكتسياسىنىڭ دەپۋتاتتارى پرەمەر-ءمينيستردىڭ كانديداتۋراسىنا داۋىس بەرۋدەن قالىس قالىپ، ۇكىمەت پەن جەرگىلىكتى اتقارۋشى ورگاندار ءوز جۇمىسىنا نەمقۇرايدى تۇردە قاراي باستادى دەپ مالىمدەدى.
"ادىرنا" ۇلتتىق پورتالى
