نۇر-سۇلتاندىق ەر ادام ءوزى ساتقان كولىگىن قايتا ۇرلاپ كەتتى

1941
Adyrna.kz Telegram

نۇر-سۇلتاندىق ەر ادام كولىگىن ساتىپ، ونى قايتادان ايداپ اكەتكەن. KIA Rio اۆتوكولىگىنىڭ جاڭا يەسى ماشينا ۇرلىعى تۋرالى پوليتسياعا شاعىمدانعان، دەپ حابارلايدى «ادىرنا» ۇلتتىق پورتالى نۇر-سۇلتان پوليتسيا دەپارتامەنتىنىڭ ءباسپاسوز قىزمەتىنە سىلتەمە جاساپ.

ول كۇنى بۇرىن تۇندە كولىگىن كىلتتەپ، دالادا قالدىرعانىن ايتقان. كەلەسى كۇنى تاڭەرتەڭ ماشيناسى جوق ەكەنىن اڭعارعان.

پوليتسيا قىزمەتكەرلەرى وقيعا ورنىن تەكسەرىپ، بەينەباقىلاۋ كامەرالارىنىڭ جازبالارىن قارادى. تاڭعى ساعات 5 شاماسىندا كۇدىكتى كولىكتى اشىپ، ايداپ اكەتكەن. قۇقىق قورعاۋشىلار كۇدىكتىنىڭ جەكە تۇلعاسىن انىقتاعاندا ونىڭ كولىكتىڭ بۇرىنعى يەسى ەكەنى بەلگىلى بولدى.

«ماشينانى ساتقاننان كەيىن ەر ادام تاعى ءبىر كىلتتى وزىنە الىپ قالعان. ول كولىكتىڭ جاڭا يەسىنىڭ مەكەنجايىن دا انىقتاپ العان. اۆتوكولىكتى ايداپ اكەتكەن سوڭ، كۇدىكتى ماشينانى جالدامالى گاراجدا قالدىرىپ، كەيىننەن باسقا وڭىرگە جولعا شىققان»، – دەدى پوليتسيادا.

ماشينا ۇرلاۋ فاكتىسى بويىنشا كەلتىرىلگەن شىعىن كولەمى ەكى ميلليون تەڭگەدەن استى.

ەلوردالىق پوليتسيا قىزمەتكەرلەرى كۇدىكتىنى قولعا ءتۇسىردى. ونىڭ قانداي جازاعا تارتىلاتىنى ءالى بەلگىسىز. الايدا قازاقستاندا ماشينا ۇرلىعى ءۇشىن 1-3 مىڭ اەك كولەمىندە ايىپپۇل (2,9-8-7 ميلليون تەڭگە) نەمەسە اباقتىدا 5 جىلدان 10 جىلعا دەيىنگى مەرزىمدە جازاسىن وتەۋ قاراستىرىلعان.

"ادىرنا" ۇلتتىق پورتالى

پىكىرلەر