پاندەميا كوپ دۇنيەگە وزگەرىس، سەرپىلىس الىپ كەلدى. ادامدار جۇمىس ىستەۋ ءۇشىن بەلگىلى ءبىر وبەكتىنىڭ بولۋى شارت ەمەس ەكەنىن ءتۇسىندى. بەلگىلى ءبىر كەستەسىز-اق ونلاين جۇمىس جاساۋعا بەت بۇرا باستادى. ۋاقىتتى ۇنەمدەيتىن، ينتەرنەتپەن تابىس تابۋدىڭ ءتيىمدى ونلاين كاسىپتەرىنە نەلەر جاتادى؟ تىزبەكتەپ بەرسەك...
ەڭ ءبىرىنشى، ەگەر دە ءسىز كاسىبي مۇعالىم نەمەسە كەز كەلگەن سالانىڭ مامانى بولساڭىز ،ينتەرنەت ارقىلى اقىلى تۇردە ساباق بەرە الاسىز. ءسىزدىڭ بىلىكتىلىگىڭىز بەن تاجىريبەڭىزگە وراي جاقسى اقشا تابا الاسىز.
ەكىنشىدەن، ءسىز بەلگىلى ءبىر كومپانياعا ونلاين-كەڭەسشى بولا الاسىز. سونداي-اق ادامدارعا ۇيلەرىندە دە قىزمەت كورسەتۋگە بولاتىن بىرقاتار قىزمەتتەر بار. مىسالى، ءسىز زاڭگەر نەمەسە ەسەپشى بولساڭىز، كليەنتتەرگە كەڭەس بەرۋ ارقىلى نەمەسە سالىق دەكلاراتسيالارىن تولتىرۋعا كومەكتەسۋ ارقىلى قوسىمشا اقشا تابۋعا بولادى.
كارانتين كەزىندە، اسىرەسە، جاندانعان كاسىپ ول - بلوگەرلىك. بلوگەرلىكتى كاسىپ دەپ ايتۋعا دا ابدەن نەگىز بار. سەبەبى ءدال وسى دۇنيە ارقىلى قانشاما ادام نانىن تاۋىپ، ءۇيىن سالىپ، كاسىپ اشىپ جاتىر. قاراپايىم ادام قانشا جىل تەر توگىپ تابا الماي جۇرگەن اقشانى، بلوگەرلەرىمىز ءبىر عانا كونتەنت ءتۇسىرىپ، ءبىر عانا جارناما جاساۋ ارقىلى تاۋىپ وتىر. كارانتين كەزىندە تويسىز قالعان انشىلەر دە ويسىز tik-tok ءتۇسىرىپ، بلوگەرلىكتىڭ جولىنا ءتۇسىپ جاتقانىنا وزدەرىڭىز دە كۋاسىزدەر.
تاعى دا ءبىر جۇلدىزى جانعان ونلاين كاسىپتىڭ ءبىرى-SMM مەنەدجەر. الەۋمەتتىك جەلىلەردىڭ ارقاسىندا پايدا بولعان كاسىپ. بۇل كاسىپتى ۇيرەنىپ الساڭىز، ايىنا كەم دەگەندە 150 مىڭنان جوعارى تابىس تاباسىز. ءبارى ءوزىڭىزدىڭ يدەيالارىڭىز بەن كرەاتيۆتىلىگىڭىزگە بايلانىستى.
سونىمەن قاتار،تەلەگرامم بوت قۇراستىرۋشىلارى، كوپيرايتەرلەر، فريلانسەرلەر، تارگەتولوگتار دا ينتەرنەت ارقىلى كارانتين كەزىندە تابىس تابۋدىڭ ءتيىمدى ونلاين كاسىپتەر قاتارىندا.
ۇلجان تۇرلىبەك
