سەمەيلىك جانە وسكەمەندىك كاسىپكەرلەر شىعىس قازاقستان وبلىسىنىڭ اكىمى دانيال احمەتوۆتىڭ وتستاۆكاعا كەتۋىن تالاپ ەتىپ وتىر. ولار ءوڭىر باسشىسىن «مەملەكەتتىك بيلىككە نۇقسان كەلتىرىپ وتىر» دەپ ايىپتادى دەپ حابارلايدى «ادىرنا» ۇلتتىق پورتالى «ينفورمبيۋروعا» سىلتەمە جاساپ.
«ءبىز شقو باسشىسى دانيال احمەتوۆتىڭ لاۋازىمىن بوساتۋ تۋرالى ماسەلەنى قاراستىرۋدى سۇرايمىز. ول مەملەكەتتىك بيلىكتىڭ ابىرويىنا نۇقسان كەلتىرۋدە. ءبىز ءوزىمىزدىڭ دۇرىس نارسە ايتىپ وتىرعانىمىزعا سەنىمدىمىز جانە الداعى ۋاقىتتا ءوز ازاماتتىق ۇستانىمىزدى قورعايمىز»، – دەدى «مەتالليست» جشس جەتەكشىسى سەرىك ايدوس.
ايماقتىڭ ءار جەرىنەن جينالعان كاسىپكەرلەر ءوڭىر باسشىسىنىڭ ارەكەتتەرىنەن زارداپ شەككەندەرىن ايتىپ، ءباسپاسوز جيىنىن وتكىزگەن. نەگىزىنەن ولار تەندەر ويناتۋدا اكىمدىكتەگىلەر اۋىز جالاسۋعا ءجيى باراتىنىن ايتىپ شاعىمدانۋدا.
بۇعان قوسا، نارازى بيزنەسمەندەر پاندەميا كەزىندە اكىمدىك تەك ءبىر مەردىگەردەن قاجەتتى زاتتار ساتىپ العانىن العا تارتادى. سوزدەرىنشە، بۇل جەردە دە ءىس تازا ەمەس. دەگەنمەن، اكىمدىك وكىلدەرى مۇنىڭ بارلىعىن جوققا شىعارىپ، ايعاقپەن دالەلدەۋدى سۇرادى.
«ايتىلعان دۇنيەلەردىڭ بارلىعى دا قۇر سوز، ەشقانداي دالەل كەلتىرىلگەن جوق. مەنىڭ ويىمشا، ايىپتاۋلاردىڭ اق-قاراسىن زاڭگەرلەر انىقتاۋى قاجەت. بەكەرگە اۋرە بولىپ، ءسوز قۇرتۋدىڭ قاجەتى جوق»، – دەدى شقو اكىمىنىڭ كەڭەسشىسى ەرماك ساليموۆ.
«ادىرنا» ۇلتتىق پورتالى
