Semeılik jáne óskemendik kásipkerler Shyǵys Qazaqstan oblysynyń ákimi Danıal Ahmetovtiń otstavkaǵa ketýin talap etip otyr. Olar óńir basshysyn «memlekettik bılikke nuqsan keltirip otyr» dep aıyptady dep habarlaıdy «Adyrna» ulttyq portaly «Informbıýroǵa» silteme jasap.
«Biz ShQO basshysy Danıal Ahmetovtiń laýazymyn bosatý týraly máseleni qarastyrýdy suraımyz. Ol memlekettik bıliktiń abyroıyna nuqsan keltirýde. Biz ózimizdiń durys nárse aıtyp otyrǵanymyzǵa senimdimiz jáne aldaǵy ýaqytta óz azamattyq ustanymyzdy qorǵaımyz», – dedi «Metallıst» JShS jetekshisi Serik Aıdos.
Aımaqtyń ár jerinen jınalǵan kásipkerler óńir basshysynyń áreketterinen zardap shekkenderin aıtyp, baspasóz jıynyn ótkizgen. Negizinen olar tender oınatýda ákimdiktegiler aýyz jalasýǵa jıi baratynyn aıtyp shaǵymdanýda.
Buǵan qosa, narazy bıznesmender pandemııa kezinde ákimdik tek bir merdigerden qajetti zattar satyp alǵanyn alǵa tartady. Sózderinshe, bul jerde de is taza emes. Degenmen, ákimdik ókilderi munyń barlyǵyn joqqa shyǵaryp, aıǵaqpen dáleldeýdi surady.
«Aıtylǵan dúnıelerdiń barlyǵy da qur sóz, eshqandaı dálel keltirilgen joq. Meniń oıymsha, aıyptaýlardyń aq-qarasyn zańgerler anyqtaýy qajet. Bekerge áýre bolyp, sóz qurtýdyń qajeti joq», – dedi ShQO ákiminiń keńesshisi Ermak Salımov.
«Adyrna» ulttyq portaly
