قازاقستاننىڭ بۇرىنعى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ ءىنىسى تيمۋرجان نۇرىمبەتوۆ 10 جىلعا باس بوستاندىعىنان ايىرىلدى، دەپ حابارلايدى «ادىرنا» ۇلتتىق پورتالى جامبىل وبلىستىق سوتىنىڭ ءباسپاسوز قىزمەتىنە سىلتەمە جاساپ.
تاراز قالاسىنىڭ №2 سوتى تيمۋرجان نۇرىمبەتوۆكە، رومانوۆا، ۋتەۋلينا، سارىمساقوۆ جانە مۇستافاعا قاتىستى قىلمىستىق ءىستى قارادى.
جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ بۇرىنعى باسشىسى نۇرىمبەتوۆ تەرگەۋ بارىسىندا 44 ملن تەڭگەدەن استام سوماعا ءىرى كولەمدە پارا الدى، الاياقتىق جاسادى، اقشانى زاڭداستىردى جانە لاۋازىمدىق وكىلەتتىكتەرىن اسىرا پايدالاندى دەپ ايىپتالدى. ونىڭ قىلمىستىق ارەكەتتەرىنىڭ ناتيجەسىندە مەملەكەتكە 54 ملن تەڭگەدەن استام سوما زالال كەلگەن.
باسقارمانىڭ بۇرىنعى قىزمەتكەرلەرى رومانوۆ پەن ۋتەۋليناعا پاراقورلىق، اسا ءىرى كولەمدە الاياقتىق جاسادى دەگەن كۇدىككە ءىلىندى. ال جشس ديرەكتورى سارىمساقوۆ پەن قب وكىلى مۇستافا اسا ءىرى كولەمدە الاياقتىق جاسادى، پاراقورلىققا دەلدال بولدى جانە ءىرى كولەمدە پارا بەردى دەپ ايىپتالدى.
پروكۋرور نۇرىمبەتوۆكە – 12 جىل، رومانوۆاعا – 8 جىل، سارىمساقوۆقا – 9 جىل، ۋتەۋليناعا – 7 جىل، مۇستافاعا – 7 جىل مەرزىمگە باس بوستاندىعىنان ايىرۋدى سۇرادى.
ادۆوكاتتار سوتتالۋشىلاردىڭ ارەكەتتەرىن ونشا اۋىر ەمەس باپتارعا قايتا سارالاۋدى جانە قوعامنان وقشاۋلاۋعا بايلانىستى ەمەس جازا تاعايىنداۋدى تالاپ ەتتى. كىنانى ءىشىنارا مويىنداۋ جەڭىلدەتەتىن ءمان-جاي، ال توتەنشە جاعداي كەزىندە قىلمىستار جاساۋ اۋىرلاتاتىن ءمان-جايلار دەپ تانىلدى. كىنا سوتتالۋشىلاردىڭ، كۋاگەرلەردىڭ ايعاقتارىمەن، ساراپتاما قورىتىندىسىمەن جانە باسقا دا دالەلدەرمەن دالەلدەندى.
«جالپى العاندا، نۇرىمبەتوۆكە مۇلكىن تاركىلەۋمەن جانە مەملەكەتتىك قىزمەتتە لاۋازىمدىق قىزمەت اتقارۋ قۇقىعىنان ءومىر بويىنا ايىرۋمەن 10 جىلعا باس بوستاندىعىنان ايىرۋ جازاسى تاعايىندالدى»، – دەدى سوتتا.
بۇل رەتتە ەكس-ءمينيستردىڭ ءىنىسى اقشانى زاڭداستىردى دەگەن ايىپتان اقتالدى.
«رومانوۆا مەن سارىمساقوۆقا 8 جىل باس بوستاندىعىنان ايىرۋ جازاسى تاعايىندالدى. ولار ءومىر بويى مەملەكەتتىك قىزمەتتە قىزمەت اتقارۋ قۇقىعىنان ايىرىلدى. قىلمىستىق جولمەن الىنعان قاراجاتقا ساتىپ الىنعان مۇلكى تاركىلەندى. ۋتەۋلينا 5 جىلعا، مۇستافا 7 جىلعا باس بوستاندىعىنان ايىرىلدى. ەكەۋى دە ءومىر بويى مەملەكەتتىك قىزمەتتە قىزمەت اتقارۋ قۇقىعىنان ايىرىلدى»، – دەپ حابارلادى جامبىل وبلىستىق سوتىنىڭ ءباسپاسوز قىزمەتى.
ۇكىم زاڭدى كۇشىنە ەنگەن جوق.
ەسكە سالايىق، بۇرىنعى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ تۋعان اعاسى پارا العان جەرىنەن ۇستالعانى تۋرالى اقپارات بىلتىرعى ءساۋىر ايىندا پايدا بولدى. تيمۋر نۇرىمبەتوۆتى 9 000 000 تەڭگە كولەمىندەگى اقشانى الىپ جاتقان كەزدە ۇستادى.
"ادىرنا" ۇلتتىق پورتالى
