«التىن بەلگى» يەگەرى ۇبت-دا ورنىنا باسقا بىرەۋدى كىرگىزبەك بولدى

4239
Adyrna.kz Telegram

ۇلتتىق بىرىڭعاي تەستىلەۋگە (ۇبت) ءتورت تالاپكەردىڭ ورنىنا ەلوردالىق ەكى جوعارى وقۋ ورنىنىڭ ستۋدەنتتەرى كىرمەك بولعان. جاسوسپىرىمدەردىڭ بۇل ارەكەتى مەكتەپ تۇلەكتەرىن ۇبت-عا كىرگىزۋ كەزىندە Face-ID جۇيەسى ارقىلى اشكەرە بولدى، دەپ حابارلايدى «ادىرنا» ۇلتتىق پورتالى.

ءبىلىم جانە عىلىم مينيسترلىگى ستۋدەنتتەردىڭ مەكتەپ وقۋشىسىنىڭ ورنىنا كىرۋ ءۇشىن جالعان قۇجاتتار جاساعاندارىن حابارلادى.

تۇلعانى تسيفرلىق سايكەستەندىرۋ Face-ID جۇيەسى بيىل ۇبت تاپسىراتىن بارلىق ورتالىقتا ەنگىزىلگەن بولاتىن. وسى جۇيەنىڭ ارقاسىندا اتالعان زاڭ بۇزۋشىلىقتار انىقتالدى.

«باعدارلاما ءتىپتى ەگىزدەردى دە انىقتاي الادى. ۇلتتىق تەستىلەۋ ورتالىعىنىڭ قىزمەتكەرلەرى ۇبت تاپسىرۋ كەزىندە زاڭ بۇزۋشىلىقتاردى قالاي انىقتاۋ كەرەك ەكەنىن جاقسى بىلەدى. تەستىلەۋگە ءوز ورنىنا بوگدە ادامدى كىرگىزبەك بولعانداردىڭ اراسىندا «التىن بەلگى» يەگەرى دە بار»، - دەدى ۇلتتىق تەستىلەۋ ورتالىعى ديرەكتورىنىڭ مىندەتىن اتقارۋشى ناۋجان ديداربەكوۆا.

11 سىنىپ تۇلەكتەرى مەن ولاردىڭ ورنىنا تەست تاپسىرماق بولعاندار تۋرالى اقپارات قۇقىق قورعاۋ ورگاندارىنا جىبەرىلدى. ولارعا قاتىستى قازاقستان قىلمىستىق كودەكسىنىڭ 385-بابى 2-بولىگى (جالعان قۇجاتتاردى، ءمورتاڭبا، مورلەردى، بلانكىلەردى قولدان جاساۋ، دايىنداۋ نەمەسە وتكىزۋ) بويىنشا قىلمىستىق ءىس قوزعالدى.

"ادىرنا" ۇلتتىق پورتالى

پىكىرلەر