ورتالىق افريكا رەسپۋبليكاسىنداعى رەسەيلىك جەندەتتەر بەيبىت تۇرعىنداردى ءولتىردى. ولاردىڭ اراسىندا بالالار دا بولدى، دەپ حابارلايدى «ادىرنا» ءتىلشىسى CNN تەلەارناسىنا سىلتەمە جاساپ.
اتاپ ايتقاندا، فاتۋما ەسىمدى بامباري قالاسىنىڭ تۇرعىنى باسىلىمعا بەرگەن سۇحباتىندا رەسەي سودىرلارىنىڭ 2021 جىلدىڭ اقپان ايىندا بىرنەشە ادامدى مەرت قىلعاندارىن ايتتى. اسكەريلەردىڭ پىكىرىنشە، ولار وار بيلىگىنە قارسى شىققان "سەلەكا" توبىنىڭ مۇشەلەرى بولۋى مۇمكىن.
فاتۋمانىڭ ايتۋىنشا، 15 اقپاندا تۇستەن كەيىن قالادا اتىس باستالعان. ايەل دەرەۋ بالالاردى جيناپ، باسقا ادامدارمەن بىرگە جاسىرىنۋ ماقساتىندا مەشىتكە بارادى. الايدا اسكەريلەر مەشىتتى قورشاپ الىپ، شىعۋدى بۇيىرعان. ادامدار مەشىتتەن قولدارىن كوتەرىپ شىعا باستاعاندا، جەندەتتەر ولارعا وق جاۋدىرعان.
بەيبىت تۇرعىندار اراسىندا بولعان ەر ادام جۋرناليستەرگە اياعىنان جاراقات العانىن ايتتى. ول مەديتسينالىق كومەك الا الماعان. اقىر سوڭىندا زارداپ شەگۋشى تىزەدەن تومەن اياقتىڭ ءبىر بولىگىن كەسىپ تاستاۋعا ءماجبۇر بولدى.
ادجا ەسىمدى قالا تۇرعىنى جەندەتتەردىڭ ءۇش كۇن بويى قازا تاپقانداردىڭ دەنەلەرىن الىپ كەتۋگە مۇمكىندىك بەرمەگەنىن مالىمدەدى. ونىڭ 15 جاسار ۇلى مەن كۇيەۋىن رەسەيلىك سودىرلار اتىپ ولتىرگەن.
تەرگەۋشىلەردىڭ ايتۋىنشا، وقيعا سالدارىنان 12-دەن 20-عا دەيىن ادام قايتىس بولعان، ولاردىڭ اراسىندا بالالار دا بار.
CNN حابارلاعانداي، ورىستارمەن بىرگە سيريادان كەلگەن جالدامالىلار دا وار-داعى سوعىس قيمىلدارىنا قاتىسقان. بۇۇ مالىمەتتەرى بويىنشا، قازىرگى ۋاقىتتا بۇل ەلدە 2300-گە جۋىق جالدامالى ادام بار.
«ادىرنا» ۇلتتىق پورتالى
