ەلباسىمىز «بولاشاققا باعدار: رۋحاني جاڭعىرۋ» ماقالاسىندا «تۋعان جەرگە، ونىڭ مادەنيەتى مەن سالت-ءداستۇرلەرىنە ايرىقشا ىڭكارلىكپەن اتسالىسۋ – شىنايى ءپاتريوتيزمنىڭ ماڭىزدى كورىنىستەرىنىڭ ءبىرى» دەپ ۇلتتىق كود، ۇلتتىق مادەنيەت ساقتالماسا، ەشقانداي جاڭعىرۋدىڭ بولمايتىنىن ايتقان بولاتىن. مىنە، اتالعان ساباق تا بۇگىنگى ۇرپاقتىڭ قازاق مادەنيەتىنە ەڭبەگى سىڭگەن ونەر قايراتكەرلەرىنىڭ ءومىرى مەن شىعارماشىلىعىمەن تانىس بولىپ، ۇلتتىق مۋزىكانىڭ، ۇلتتىق اسپاپتىڭ ۇرپاقتان-ۇرپاققا جەتكەن مۇرا ەكەندىگىن بىلۋگە، ونى قۇرمەتتەۋگە باۋلۋ، سونداي-اق، ۇلتتىق مۋزەي قورىنداعى بولات سارىباەۆ كوللەكتسياسىنداعى مۋزىكالىق اسپاپتاردى ناسيحاتتاۋ ماقساتىندا ۇيىمداستىرىلدى.
ساباققا استانا قالاسىنىڭ مەكتەپ وقۋشىلارى قاتىسىپ، عالىمنىڭ ءومىرى مەن شىعارماشىلىعى، قازاقتىڭ مۋزىكالىق اسپاپتارى جايىندا جان-جاقتى اقپارات الدى.
قازاق مۋزىكاسىنىڭ تاريحىندا «سارىباەۆ كەستەسى» دەگەن اتاۋمەن قالعان عالىمنىڭ اسپاپتاردىڭ ورىندالۋ ەرەكشەلىكتەرىنە بايلانىستى جىكتەگەن كەستەسىمەن تانىسىپ، ۇلتتىق اسپاپتارعا قاتىستى ءار ءتۇرلى تاپسىرمالاردى ۇلكەن قىزىعۋشىلىقپەن ورىندادى. حالىق اراسىندا كەڭ تانىلماعان داڭعىرا، ادىرنا، ساقپان سياقتى ت.ب. اسپاپ تۇرلەرىمەن، ولاردىڭ جاسالۋ جولدارىمەن تانىستى. كەش سوڭىندا №1 ونەر مەكتەبىنىڭ وقۋشىسى باحتيار شىڭعىستىڭ قوبىزدا حالىق كۇيى «باقسى سارىنى» ورىندادى.
قازاق حالقىنىڭ كونە مۋزىكالىق اسپاپتارى مەن ءداستۇرلى قازاق مۋزىكا مادەنيەتىنىڭ جاندانۋى بولات شامعاليۇلى سارىباەۆ ەسىمىمەن تىعىز بايلانىستى. ەسەلى ەڭبەكتەرىنىڭ ارقاسىندا ول شاڭقوبىز، سىبىزعى، سازسىرناي، ۇسكىرىك، ءۇش ىشەكتى دومبىرا، شەرتەر، جەتىگەن سياقتى 30-عا جۋىق قازاقتىڭ كونە مۋزىكالىق اسپاپتارىن ىزدەپ تاۋىپ، جارىققا شىعاردى. قازاقتان وزگە تۇركى تىلدەس حالىقتاردىڭ 400-دەن استام مۋزىكالىق اسپاپتارىن جيناپ، 300-گە جۋىق مونوگرافيالىق ەڭبەكتەر جازدى. ءوزىنىڭ ەكى بولمەلى پاتەرىنە ول ەكى ءجۇز ەلۋدەن استام مۋزىكالىق اسپاپتاردى جيناپ، مۇراجاي اشتى.
بولات سارىباەۆتىڭ عىلىمي زەرتتەۋ جۇمىستارىنىڭ ناتيجەسىندە قازاق حالقىنىڭ باي مۇراسى كەڭىنەن ناسيحاتتالىپ، ۇمىت بولا باستاعان ءتول ونەرىمىز قايتا جانداندى. مۋزىكا زەرتتەۋ سالاسىنداعى ەڭبەكتەرى مەن ىزدەنىستەرى كوزى تىرىسىندە-اق جوعارى باعالانىپ، ونى «مۋزىكا ارحەولوگى» دەپ اتاپ كەتكەن.
باسقالارمەن بولىسە
وتىرىڭىز
