توكيو وليمپياداسىندا قازاقستان نامىسىن التى دزيۋدوشى قورعايدى

6273
Adyrna.kz Telegram

حالىقارالىق دزيۋدو فەدەراتسياسى وليمپيادالىق رەيتينگكە سايكەس توكيوداعى جازعى وليمپيادا ويىندارىنا جولداما العان دزيۋدوشىلار ءتىزىمىن جاريالادى دەپ حابارلايدى «ادىرنا» ءتىلشىسى Olympic.kz-كە سىلتەمە جاساپ.

وليمپيادالىق رەيتينگكە سايكەس التى قازاقستاندىق دزيۋدوشى ليتسەنزياتتار قاتارىنا ەنگەن. اتاپ ايتار بولساق، 60 كەلىدە ەلدوس سمەتوۆ پەن عۇسمان قىرعىزباەۆ، 66 كەلىدە ەرلان سەرىكجانوۆ پەن ەلدوس جۇماقانوۆ، 73 كەلىدە جانساي سماعۇلوۆ، 90 كەلىدە يسلام بوزباەۆ، ايەلدەر اراسىندا 48 كەلىدە وتگونتسەتسەگ گالبادراح وليمپيادالىق رەيتينگتە ءتيىستى ۇپاي جيناعان. ال 81 كەلىدەگى ديدار حامزاعا قۇرلىقتىق كۆوتا بەرىلدى.

جولداما دزيۋدوشىلاردىڭ وليمپيادالىق رەيتينگتەگى ورىندارىنا سايكەس ۇلەستىرىلدى. وزدەرىڭىز بىلەتىندەي، دزيۋدودان وليمپيادا ويىندارىنا وليمپيادالىق رەيتينگتە ۇزدىك 18 سپورتشى جولداما الادى. دزيۋدوشىلار 2018 جىلدىڭ 25 مامىرىنان حالىقارالىق دزيۋدو فەدەراتسياسىنىڭ كۇنتىزبەسىنە سايكەس رەيتينگتىك جارىستاردا ۇپاي جينادى.

- ءبىر سالماق دارەجەسىندە بىرنەشە سپورتشى ۇمىتكەر بولعانىمەن، شارت بويىنشا كىمدە ۇپاي كوپ، سول سپورتشىعا ءتورت جىلدىقتىڭ باستى باسەكەسىنە قاتىسۋعا مۇمكىندىك بەرىلەدى. ماسەلەن، ەرلەر اراسىندا 60 كەلىدە ەلدوس سمەتوۆ نەگىزگى ۇمىتكەر بولسا، عۇسمان قىرعىزباەۆ قوسالقى تىزىمدە، 66 كەلىدە ەرلان سەرىكجانوۆ نەگىزگى تىزىمگە ەنسە، ءدال وسى سالماقتا ەلدوس جۇماقانوۆ قوسالقى تىزىمگە ەنگەن. قازاقستان ساپىنان توكيو وليمپياداسىنا قاتىساتىن قۇرام وليمپيادالىق رەيتينگكە سايكەس جاقىن ارادا بەلگىلى بولادى، - دەيدى باس باپكەر عالىمجان جىلگەلديەۆ.

وتاندىق دزيۋدوشىلار 2018 جىلدىڭ 25 مامىرىنان باستاپ ءتۇرلى حالىقارالىق سىنداردا باق سىناپ، رەيتينگتەگى جاعدايىن جاقسارتقان بولاتىن. ناتيجەسىندە، وليمپيادالىق رەيتينگ بويىنشا ليتسەنزياعا يە بولعان سپورتشىلار ەسىمى انىقتالدى. الايدا، تورتجىلدىق دوداسىنا ءار ەلدەن تەك ءبىر سپورتشىنىڭ قاتىساتىنىن ەستەرىڭىزگە سالامىز. دزيۋدوشىلار وليمپيادا ويىندارىندا بارلىعى 14 سالماق ( ەرلەر - 7, ايەلدەر -7) بويىنشا ءوزارا مىقتىنى انىقتايدى. ءۇش جىل كولەمىندە بەس قۇرلىقتاعى 110 مەملەكەتتىڭ سپورتشىلارى وليمپيادا ارەناسىندا باق سىناۋ ءۇشىن تەر توكتى.

العاشىندا ىرىكتەۋ كەزەڭى 2020 جىلدىڭ ماۋسىمىندا اياقتالۋى ءتيىس بولاتىن. كەيىن 2021 جىلدىڭ ماۋسىمىنا دەيىن جالعاسىپ، ۆەنگرياداعى الەم چەمپيوناتىنان كەيىن ۇپايلار ەسەپكە الىنا باستادى. وسىلايشا توكيو تاتاميىندە سىنعا تۇسەتىن سپورتشىلار ەسىمى جاريالاندى.

«ادىرنا» ۇلتتىق پورتالى

پىكىرلەر