ءماجىلىس دەپۋتاتى داريعا نازارباەۆا ۇكىمەت باسشىسىنا ساۋال جولداپ، اۋىلداردى ساپالى ينتەرنەتپەن قامتاماسىز ەتۋ ماسەلەسىن كوتەردى، دەپ حابارلايدى «ادىرنا» ۇلتتىق پورتالى Sputnik قازاقستان سايتىنا سىلتەمە جاساپ.
«2020 جىلدىڭ ناتيجەسى بويىنشا مەملەكەت قازاقستان رەسپۋبليكاسى حالقىنىڭ 98,7% ينتەرنەت جەلىسىنە كەڭجولاقتى قولجەتىمدىلىكپەن قامتاماسىز ەتتى. بۇل سانداردىڭ دۇرىستىعىنا ساراپشىلار دا، حالىق تا كۇمان كەلتىرەدى. 510 اۋىلدا ينتەرنەتتىڭ جىلدامدىعى تومەن»، - دەدى نازارباەۆا ءماجىلىستىڭ جالپى وتىرىسىندا.
وسى ورايدا ول Nur Otan-نىڭ سايلاۋالدى باعدارلاماسىندا 2021 جىلى اۋىل مەكتەپتەرىنىڭ 80 پروتسەنتىن جوعارى جىلدامدىقتى ينتەرنەتپەن قامتاماسىز ەتۋ مىندەتىنىڭ جازىلعانىن ەسكە سالدى.
«تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى جىلدامدىقتىڭ تومەن بولۋىنىڭ سەبەبى رەتىندە اۋىلدىق ەلدى مەكەندەردى ينتەرنەتپەن قامتاماسىز ەتۋ ءۇشىن قوسىمشا قوسىلۋلاردى پايدالانۋ قاجەتتىگىن ايتتى. وسىعان بايلانىستى مىنا سۇراقتارعا جاۋاپ بەرۋىڭىزدى سۇرايمىن. اۋىلدىق ەلدى مەكەندەردە ينتەرنەت جەلىسىنە قولجەتىمدىلىكتى قامتاماسىز ەتۋدىڭ ناقتى تەحنولوگياسىن قولدانۋ تۋرالى شەشىم قالاي قابىلدانادى جانە وسى تەحنولوگيالاردىڭ ايىرماشىلىعى نەدە؟»، - دەپ سۇرادى نازارباەۆا.
بۇدان بولەك، دەپۋتات «سوڭعى ميليا» ماسەلەسىن ءتۇسىندىرۋدى سۇرادى.
«اۋىلدىق ەلدى مەكەندەردە ينتەرنەتكە قوسىلۋ ساپاسىن تۇراقتى نەگىزدە ولشەۋ جۇرگىزىلە مە جانە بۇل ماسەلە قازاقستان رەسپۋبليكاسىنىڭ قانداي مەملەكەتتىك ورگانىنىڭ قۇزىرەتىندە تۇر؟»، - دەدى دەپۋتات.
"ادىرنا" ۇلتتىق پورتالى
