پرودۋكتيۆتىلىك پەن ەففەكتيۆتىلىكتىڭ ايىرماشىلىعى

3551
Adyrna.kz Telegram
فوتو اشىق اقپارات كوزىنەن الىندى
فوتو اشىق اقپارات كوزىنەن الىندى

ايمان: مەن اي سايىن ەكى كىتاپ وقيمىن.

شولپان: سول دا ءسوز بوپ پا؟ مەن ايىنا تورتەۋىن بىتىرەمىن.

بۇل ديالوگتان شولپاندى ناعىز پرودۋكتيۆتى دەرسىڭ. ۋاقىتىن ءتيىمدى پايدالانىپ-اق ءجۇر. اپتاسىنا ءبىر كىتاپتى بىتىرە سالۋ ول ءۇشىن تۇككە تۇرعىسىز. الايدا، ول ەففەكتيۆتى مە؟

ايمان ءبىر كىتاپتى ەكى اپتا نە ودان دا ۇزاق وقىعانىمەن، بارىنشا تىڭعىلىقتى، مۇقيات بولۋى ابدەن مۇمكىن. وقىعان اقپاراتىن جازىپ الىپ، ونى ومىردە قولدانىپ، اينالاسىنداعىلارمەن بولىسەتىن شىعار. مۇنى ەففەكتيۆتىلىك دەيدى. دەسە دە، بۇل مىسال شولپاننىڭ كىتاپتى ءاتۇستى وقي سالاتىنىن بىلدىرمەيدى. بايقاعانىمىزداي، ەكەۋىنىڭ پرودۋكتيۆتىلىگى دە، ەففەكتيۆتىلىگى دە ءار ءتۇرلى.

پرودۋكتيۆتىلىك از ۋاقىتتا كوپ جۇمىس تىندىرۋدان كورىنىس تابادى. ال ەففەكتيۆتىلىك ارەكەتتىڭ قانشالىقتى ساپالى بولعانىن اڭعارتادى.

كوبىنە جۇمىس بەرۋشىلەر قىزمەتكەردەن پرودۋكتيۆتىلىكتى تالاپ ەتەدى. قىزمەتكەر تىم پرودۋكتيۆتى بولۋى مۇمكىن. بىراق از ۋاقىتتا كوپ جۇمىس تىندىرامىن دەپ، كۇش-جىگەرىن كەرەكسىز دۇنيەگە سارپ ەتسە شە؟!

مىسالى، اپتاسىنا 7 سيۋجەت ۇسىناتىن جۋرناليست پەن اپتاسىنا 2 سيۋجەت ۇسىناتىن ءجۋرناليستىڭ ايىرماشىلىعى بار. نەگە؟ سەبەبى ءبىرى سانعا، ءبىرى ساپاعا جۇمىس ىستەيدى. بىراق، ناتيجە ەكى ءتۇرلى.

ءتىپتى بولماسا، بىرنەشە ءتىلدى قاتار ۇيرەنۋگە بەل بايلاعان داۋلەت پەن ءبىر ءتىلدى جاقسىلاپ ۇيرەنۋگە كۇش سالعان ساۋلەتتىڭ مىسالىن قاراستىرۋعا بولادى. ساۋلەت بىرنەشە ءتىلدى قاتار ۇيرەنبەسە دە، داۋلەتكە قاراعاندا ءبىر تىلدە ەركىن سويلەپ كەتۋ ىقتيمالدىعى جوعارى.

جوعارىداعى مىسالدار قاراپايىم ءارى ۇعىنىقتى بولدى دەپ ويلايمىن. كۇندەرىڭىز پرودۋكتيۆتى، ارەكەتتەرىڭىز ەففەكتيۆتى بولسىن!

نازەركە اسەتوۆا

پىكىرلەر