كۇندەلىكتى جۇرگىزىلىپ وتىرعان مونيتورينگ بويىنشا بۇگىنگى كۇنگە قالانىڭ ىشكى نارىعىنداعى الەۋمەتتىك ماڭىزى بار 19 نەگىزگى ازىق-تۇلىك تاۋارلارىنىڭ شەكتى باعا دەڭگەيىمەن سالىستىرمالى كورسەتكىشى بويىنشا 3 ونىمدە ءوسىم بايقالسا، قالعان ونىمدەردىڭ باعاسى شەكتى باعا دەڭگەيىندە، ياعني ءبىر قالىپتا تۇر. بۇل تۋرالى بۇگىن اۋىل شارۋاشىلىعى جانە ۆەتەريناريا باسقارماسىنىڭ باسشىسى ا.قانىبەكوۆ قالا اكىمدىگىنىڭ «Instagram» جانە Facebook پاراقشاسىندا وتكەن تىكەلەي ەفيردە مالىمدەدى.
ونىڭ ايتۋىنشا، بۇگىنگى كۇنى قالادا الەۋمەتتىك ماڭىزى بار ازىق-تۇلىك ونىمدەرىنىڭ باعالارىن تۇراقتاندىرۋ ماقساتىندا جۇمىس توبى مەن تۇراقتاندىرۋ قورىن باسقارۋ كوميسسياسى جۇمىس جاسايدى.
«جالپى حالىق كۇندەلىكتى ءبىرىنشى كەزەكتە تۇتىناتىن الەۋمەتتىك ماڭىزى بار ازىق-تۇلىك باعالارى باستى نازاردا. بۇگىندە ازىق-تۇلىك تاۋارلارىنىڭ باعاسى ءوندىرۋشىنىڭ وزىندىك قۇنىنىڭ ارتۋىمەن جانە وندىرىستە پايدالاناتىن شيكىزات باعاسىنىڭ وسۋىنە بايلانىستى قىمباتتاپ وتىر. وسى ورايدا، قالامىزدا الەۋمەتتىك ماڭىزى بار ازىق-تۇلىك تاۋارلارىنا باعانى تۇراقتاندىرۋ شارالارى شەڭبەرىندە بىرقاتار جۇمىستار اتقارىلدى»،-دەدى باسقارما باسشىسى.
ماسەلەن، الەۋمەتتىك ازىق-تۇلىك تاۋارلارىنىڭ باعاسىن نەگىزسىز وسىرمەۋ ماقساتىندا ءىرى ساۋدا جەلىلەرى، ازىق-تۇلىك بازارلارى جانە جەرگىلىكتى تاۋار وندىرۋشىلەرى مەن ەكى جاقتى ورتاق 14 مەموراندۋمعا قول قويىلدى. سونىمەن بىرگە، تۇراقتاندىرۋ قورىنىڭ اينالىم مەحانيزمى بويىنشا ءىرى ساۋدا جەلىلەرى «گراماد»، «فيركان»، «Magnum Cash&Carry» جانە جەرگىلىكتى تاۋار وندىرۋشىلەرى، كاسىپكەرلىك سۋبەكتىلەرىنە اينالىمعا قارىز قاراجات بەرىلىپ، كەلىسىم شارت ءتۇزىلىپ، بىرقاتار الەۋمەتتىك ماڭىزى بار ازىق-تۇلىك تاۋارلارى بەلگىلەنگەن باعادا ساتىلۋدا.
بۇدان بولەك، ءبىرىنشى قاجەتتىلىكتەگى نەگىزگى ازىق-تۇلىك باعالارىن تۇراقتاندىرۋ اياسىندا قالانىڭ 8 جەرىنەن «Hermes» جشس-ءنىڭ جىلجىمالى الەۋمەتتىك ساۋدا نۇكتەلەرى ۇيىمداستىرىلىپ، كوكونىس ونىمدەرى بەلگىلەنگەن باعادا ساتىلۋدا.
ءار اپتا سايىن تۇراقتى تۇردە قالانىڭ 4 جەرىندە ازىق-تۇلىك جارمەڭكەلەرى وتكىزىلۋدە («فوسفورشىلار» مادەنيەت ءۇيىنىڭ الدى، «قاجىمۇقان» اتىنداعى ورتالىق ستاديون اۋماعى، «1000 ۇساق-تۇيەك» ساۋدا قاتارى، «راحيما پلازا» ساۋدا ورتالىعىنىڭ جانى).
بۇعان قوسا، حالىقتىڭ تىعىز ورنالاسقان ايماعىندا (ەڭبەكشى اۋدانى، ەلشىبەك باتىر كوشەسى №116) الەۋمەتتىك دۇكەن اشىلىپ، كۇندەلىكتى تۇتىناتىن ازىق-تۇلىك تاۋارلارى تومەن باعادا ساتىلۋدا.
شىمكەنت قالاسى اكىمدىگىنىڭ ءباسپاسوز قىزمەتى
