پاندەمياعا بايلانىستى رەيستەردى توقتاتۋ مەن كەشىكتىرۋ ءجيى قۇبىلىس بولدى. سەبەبى، تاسىمالداۋشىلار ۇكىمەتتىڭ جاڭا شەكتەۋلەرىنە، شەكارالاردىڭ جابىلۋىنا جانە ناقتى سۇرانىسقا بەيىمدەلۋدە.
يكەمدى تاريفتەردى تاڭداڭىز
پاندەمياعا دەيىن بەلگىلى ءبىر كۇنگە قايتارىلمايتىن تاريفتەر مەن رەيستەر ۇنەمدەۋدىڭ سەنىمدى ءادىسى بولدى. بىراق 2021 جىلى ساياحاتتاۋ ءۇشىن بۇل ءتاسىل جارامايدى. ويتكەنى جوسپارلار كۇتپەگەن جەردەن وزگەرەدى. بىراق وسىعان قاراماستان تيىمدى نۇسقالاردى تابۋعا بولادى. ونىڭ سىرى - يكەمدىلىكتە. ۇشۋ نەمەسە تۇرعىن ۇيلەردى برونداۋ كەزىندە تاپسىرىستى جويۋ جانە وزگەرتۋ شارتتارى سياقتى مول ۇسىنىستاردى تاڭداڭىز. سوندا ەگەر ساپاردى كەيىنگە قالدىرۋعا تۋرا كەلسە، ءسىز اقشا جوعالتپايسىز.
رەسمي ساپار شەكتەۋلەرىن باقىلاڭىز
2020 بىزگە ۇلتتىق جانە ايماقتىق شەكارالاردىڭ قانشالىقتى تەز جابىلاتىنىن كورسەتتى. سوندىقتان ساپاردى برونداماس بۇرىن جەرگىلىكتى بيلىكتىڭ، ءسىز تۇراتىن جانە باراتىن جەرەڭىزدىڭ ۆەب-سايتىنداعى اكتۋالدى ۇسىنىستاردى تەكسەرىڭىز. ەكى جاعىنان دا جاسىل ءتۇس قاجەت. جولعا شىعۋ كۇنى كەلگەندە اۋەجايداعى توقتاتىلعان رەيسكە تاپ بولماۋ ءۇشىن ەرەجەلەردىڭ، رەسمي شەكتەۋلەردىڭ جاڭارتىلۋىن باقىلاپ ءجۇرىڭىز.
ترانزيت پەن ستوپوۆەرلەردى ەسكەرە وتىرىپ جوسپارلاڭىز
ءار باعىتتىڭ ترانزيتتىك جولاۋشىلار ءۇشىن ءوز ەرەجەلەرى بار. كەيبىر اۋەجايلاردا ساياحاتشىلار ارنايى ۆيزالار مەن كارانتيندىك شەكتەۋلەرسىز ترانزيتتىك ايماقتا ەركىن جۇرە الادى. باسقالارىندا، كەرىسىنشە، ءسىزدى كارانتينگە جاتقىزۋى نەمەسە ستوپوۆەرلەر مەن لەيوۆەرلەر مۇلدەم تىيىم سالۋى مۇمكىن. ساياحاتتى برونداۋ كەزىندە ءوزىڭىزدىڭ جولىڭىزداعى بارلىق ترانزيتتىك نۇكتەلەردەگى شەكتەۋلەردى ەسكەرىڭىز. ەگەر ءسىز ءبىر ۋاقىتتا بىرنەشە ەلدە دەمالۋدى جوسپارلاساڭىز، بۇل وتە ماڭىزدى.
كەشەندى تۋريستىك ساقتاندىرۋدى رەسىمدەڭىز
مەديتسينالىق ساقتاندىرۋ قاجەتتىلىگى ءاردايىم قىزۋ پىكىرتالاس تۋدىرعانىمەن، 2021 جىلدىڭ جازعى جانە قىسقى دەمالىسىن جوسپارلاۋ ءۇشىن ونىڭ ماڭىزدىلىعىن جوققا شىعارۋ مۇمكىن ەمەس. ساقتاندىرۋدى جاساماس بۇرىن ەرەجەلەر مەن شارتتاردى مۇقيات وقىپ شىعىڭىز. كوپتەگەن ساقتاندىرۋ كومپانيالارى 2020 جىلدىڭ كوكتەمىنەن باستاپ COVID-19 پاندەمياسى بولىپ سانالاتىن "بەلگىلى وقيعا" كەلتىرگەن زالالدى وتەمەيدى. ساقتاندىرۋدىڭ بەلگىلى ءبىر جەرلەرگە ساپارلاردى عانا وتەيتىن تۇرلەرى بار. بۇل - كوروناۆيرۋستىق ينفەكتسيانى جۇقتىرۋ قاۋپى تومەن باعىت. ەگەر ساپار توقتاتىلسا نەمەسە ءسىز شەتەلدە اۋىرىپ قالساڭىز، نە نارسەگە ارقا سۇيەۋگە بولاتىندىعىن ناقتى ءتۇسىنۋ ءۇشىن كىشكەنە ماتىنگە مۇقيات قاراڭىز.
ناعيما ساحان
