ومىردە ادام تاڭعالارلىق وقيعالار كوپ بولادى. جۋىردا قىزىلوردا وبلىسىنىڭ تۇرعىنى بۇرىن اجىراسقان ايەلىن قايتادان الىپ قاشىپ، دۇركىرەتىپ توي جاسادى. بۇل جاعداي جۇرتتى ەلەڭ ەتكىزسە دە، دۋمانعا جينالعان كوپشىلىك جاستارعا باقىت تىلەدى، دەپ حابارلايدى «ادىرنا» ۇلتتىق پورتالى Stan.kz اقپارات اگەنتتىگىنە سىلتەمە جاساپ.
جازيرانىڭ جاسى بيىل 34-كە تولدى. وسىدان تۋرا ون جىل بۇرىن العاش رەت تۇرمىسقا شىعىپ، سۇيىكتىسىمەن نەكەسىن قيدىرعان. كۇيەۋى ابزال ەكەۋى ءبىر مەكتەپتىڭ تۇلەكتەرى، ءبىر-ءبىرىن جاقسى تانيدى. قالادان وقۋ ءبىتىرىپ كەلگەن جاستار، وتباسىن قۇرىپ، جاڭا ءومىردى بىرگە باستاۋعا شەشىم قابىلداعان. بولاشاق قۇدالار دەرەۋ تويعا دايىندالىپ، قۋانىشتى كۇندى لايىقتى اتاپ وتۋگە كىرىسىپ كەتكەن.
«ابزال - ءبىر وتباسىنىڭ جالعىز ۇلى، اتا-اناسىنىڭ ءۇمىتىن ارقالاعان ازامات. مەن جارىمنىڭ ريزاشىلىعىن الۋ ءۇشىن، اتا-اناسىنىڭ كوڭىلىن تابۋىم كەرەك ەكەنىن جاقسى ءتۇسىندىم. كەلىن بولىپ تۇسكەن كۇننەن باستاپ، ءۇيدىڭ شارۋاسىن جاقسى جۇرگىزۋگە تىرىستىم. سيىر ساۋىپ، ايران ءپىسۋدى، قۇرت دايىنداۋدى ۇيرەندىم. ءوزىم اۋىل اكىمشىلىگىندە ەسەپشى بولىپ جۇمىس تا جاسادىم. ابزال مال شارۋاشىلىعىمەن اينالىسىپ، ءىرى قارانى بورداقىلاۋدى كاسىپ ەتتى. تۇرمىسىمىز جاقسى بولدى، ۇيىمىزدەن قوناق ارىلمايتىن»، - دەپ اڭگىمەسىن باستادى جاس كەلىنشەك.
اراعا ءبىر جىل سالىپ جازيرانىڭ اياعى اۋىرلاپ، دۇنيەگە قىز بالا اكەلگەن. اتا-اجەسى نەمەرەلى بولعاندارىنا قۋانىپ، اۋىل تۇرعىندارى دۇبىرلەتىپ توي دا جاساعان. كەيىن كوپ ۇزاماي، جاس وتباسىندا تاعى ءبىر قىز دۇنيەگە كەلىپتى. الايدا بۇل جولى ەنە مەن كەلىن اراسىنداعى قارىم-قاتىناس بۇزىلىپ، ءجيى جانجال تۋىندايتىن بولعان.
«ەنەم «نەگە قىز تۋا بەرەسىڭ» دەپ ۇرىساتىن بولدى. بالا اللانىڭ بەرگەنى عوي. ۇل بولا ما، قىز بولا ما ماعان بايلانىستى ەمەس قوي. مەن وسىنى تۇسىندىرە المادىم. ەكىنشى رەت بوسانعاننان كەيىن، دەنساۋلىعىمدى جوندەۋ ءۇشىن ساقتاناتىن بولدىم. جانۇيامىزداعى جاعداي دا باسىلعانىن قالادىم. قانشا تىرىسسام دا، ەنەمنىڭ قاباعى ءبىر جىلىمادى. ۇرىسقا سىلتاۋ ىزدەيتىندى شىعاردى. قىزدارىما جەكىپ سويلەيتىنى جانىما باتاتىن»، - دەيدى جازيرا.
وتباسىلىق جانجال كەزىندە جازيرانىڭ كۇيەۋى اناسىن جاقتاپ، ايەلىن قولداماعان ەكەن. بۇل جاعداي جاس كەلىنشەكتىڭ جانىنا قاتتى باتقانىن ايتادى. وسىدان ءۇش جىل بۇرىن قىزىلوردالىق ايەل العاش رەت بالالارىن الىپ، توركىنىنە كەتىپ قالعان. ابزال توقتا دەپ تە ايتپاعان كورىنەدى. «اناما قارسى سويلەدىڭ» دەپ جۇبايىن ايىپتاپ، بالاعات سوزدەر ايتىپتى.
«سول كۇنى توركىنىمە جىلاپ بارعانىم ءالى ەسىمدە. جانىمداعى ەكى قىزىم دا جىلاپ تۇردى. ءبىراز ۋاقىتقا دەيىن ابزالدى كۇتكەنىم راس. ەنەم ەكەۋى كەلىپ، ۇيگە الىپ كەتەدى دەپ ويلادىم. بىراق كۇيەۋىم مەنىڭ تەلەفونىما دا قوڭىراۋ سوقپاي قويدى. ارا-اراسىندا اقشا سالىپ جىبەرىپ تۇردى. جاعداي وزگەرمەگەندىكتەن، مەن دە اجىراسۋعا ارىز تاستاپ سوتقا جۇگىندىم. زاڭ بويىنشا نەكەمىز بۇزىلىپ، ەكەۋمىز ەكى جاققا كەتتىك. مەن قالاعا جۇمىسقا تۇرىپ، پاتەر جالدادىم. انام بالالارعا قاراۋعا كومەكتەسىپ ءجۇردى»، - دەيدى كەيىپكەرىمىز.
ارادا بىرنەشە اي وتكەننەن كەيىن، ابزال جازيراعا حابارلاسىپ، بالالارىمەن كەزدەسكىسى كەلەتىنىن ايتقان. جاس كەلىنشەك قىزدارىن اكەسىنە تاپسىرىپ جىبەرگەن. سول ۋاقىتتان باستاپ بۇرىڭعى كۇيەۋى ءجيى كەلىپ، جانۇياسىنىڭ جانىنان تابىلاتىن بولعان. سوزىنشە، بۇرىنعى ەرلى-زايىپتىلاردىڭ سەزىمى قايتا ويانعان. .
«ابزال اتا-اناسىنىڭ رۇقساتىن الىپ، قالاعا كوشىپ كەتتى. اۋىلداعى كاسىبىن ىنىلەرىنە تاپسىردى. بۇرىنعىداي بىرگە ءومىر سۇرەتىن بولدىق. وتباسىمىزبەن قايتا قاۋىشقانىنا قۋانىپ ءجۇردىم. بالالارىم دا اكەلەرىمەن بىرگە باقىتتى بولدى. اقشامىزدى جيىستىرىپ، ءوزىمىزدىڭ باسپانامىزدى الۋدى ارماندايتىن بولدىق. بولاشاققا دەگەن جوسپارلارىمىز كوپ»، - دەيدى جاس كەلىنشەك.
ابزال جازيرانى ويدا-جوقتا الىپ قاشقان. سۇيىكتىسىنىڭ جوسپارىن جاس كەلىنشەك مۇلدەم بىلمەگەن. دوستارىمەن بىرگە ايەلدى كولىككە مىنگىزىپ، اۋىلعا الىپ كەتكەن. ىزدەرىمەن بالالارى دا كەلىپ، تويدىڭ قادىرلى قوناعى بولىپتى.
«شىنىمدى ايتسام، باستاپقىدا شوشىپ كەتتىم. كەيىن ابزال ماعان قايتادان ۇيلەنگىسى كەلەتىنىن ايتتى. اۋىلداعى ۇيدە كادىمگىدەي توي بولدى. ءتىپتى «بەتاشار» جاساعىلارى دا كەلىپتى. بىراق ەكى بالاسى بار كەلىنشەكتىڭ بەتى اشىلمايتىنى بەلگىلى عوي. ەنەممەن دە قازىر ارا-قاتىناسىمىز الدەقايدا جاقسى. شامالى ۋاقىت اۋىلدا بولامىز دەپ شەشتىك. اتا-اجەسى دە نەمەرەلەرىن قاتتى ساعىنعان. بۇل جولى باقىتىمىز باياندى بولادى دەپ سەنەمىن»، - دەيدى جازيرا.
"ادىرنا" ۇلتتىق پورتالى
