قۇقىق قورعاۋ ورگاندارىنىڭ بۇرىنعى قىزمەتكەرى بۇرىنعى ايەلىن سوتقا بەرىپ، باق-تا جاريالانعان اقپاراتتى جارامسىز دەپ تانۋدى سۇرادى، دەپ حابارلايدى «ادىرنا» ۇلتتىق پورتالى Stan.kz اقپارات اگەنتتىگىنە سىلتەمە جاساپ.
بىلتىر پوليتسەيدىڭ بۇرىنعى ايەلى اسەل باسىلىم جۋرناليستەرىنە التى جىل بويى كۇيەۋىنەن كورگەن قورلىعى جايلى ايتىپ ەدى.
ماتەريال باق-تا جاريالانعاننان كەيىن ەر ادام بۇرىنعى ايەلىن سوتقا بەردى جانە ماقالانىڭ شىندىققا جاناسپايتىنىن مالىمدەدى. ول ايەلدەن ءبىر ميلليون تەڭگە تالاپ ەتتى.
سوت پروتسەسىندە بۇرىنعى ايەلىنەن باسقا، «ورال اپتالىعىنىڭ» رەداكتورى مەن جۋرناليستەرى جاۋاپكەر بولدى.
ايەلدىڭ ادۆوكاتى تالاپ قويۋدان باس تارتۋدى ءوتىندى، ويتكەنى ۇرىپ-سوعۋ فاكتىسى ءىس ماتەريالدارىنا تىركەلگەن قۇجاتتارمەن راستالدى. جۋرناليستەر مەن پورتال رەداكتورى دا سوت ىسىنەن باس تارتۋدى سۇرادى. سەبەبى ولار جاريالانعان اقپارات راس ەكەنىنە سەنىمدى بولدى.
وبلىستىق سوتتىڭ سۋدياسى حاتيما ەرسەنوۆا ءىس ماتەريالدارىن زەرتتەپ، ەكس-پوليتسەيدىڭ ارىزىن قاناعاتتاندىرمادى. نەگىزى سوت ساراپتاماسى بولدى، ول بۇرىنعى كۇيەۋى اسەلدى ۇرعانىن راستادى.
«وعان زاتپەن زاقىم كەلدى، بەتى، ارقاسى جانە قولدارى كوگەردى، سونىمەن قاتار ساراپتاما جابىرلەنۋشىنىڭ ميى شايقالعانىن انىقتادى»، – دەدى وبلىستىق سوتتىڭ سۋدياسى.
ەرسەنوۆا اسەلدىڭ ءوتىنىشى بويىنشا ەر ادامعا قاتىستى اكىمشىلىك جانە قىلمىستىق ىستەردى دە زەرتتەدى. سوت ماتەريالداردى قاراۋ بارىسىندا ولاردا سيپاتتالعان بارلىق وقيعالاردىڭ ورىن العانىن انىقتادى.
بۇرىنعى پوليتسيا قىزمەتكەرىنىڭ تالاپ ارىزىن سوت قاناعاتتاندىرۋسىز قالدىردى.
سوتتا اسەل بۇرىنعى كۇيەۋى ءالى كۇنگە دەيىن ونى قۋدالاپ، «ولتىرەمىن» دەپ قورقىتقانىن اتاپ ءوتتى.
ەسكە سالا كەتەيىك، بۇعان دەيىن ايەل الەۋمەتتىك جەلىدە كۇيەۋى سوققىعا جىققاننان كەيىنگى سۋرەتىن جاريالاعان ەدى. اسەل كۇيەۋى ءبىرىنشى رەت قىزى 4 ايلىق بولعان كەزدە قول كوتەرگەنىن ايتتى. ايەلدىڭ ايتۋىنشا، كۇيەۋى التى جىل بويى ۇرىپ-سوققان. اسەل اۋرۋحاناعا تۇسكەننەن كەيىن وتباسىنداعى زورلىق-زومبىلىق تۋرالى ايتۋدى ءجون سانادى.
"ادىرنا" ۇلتتىق پورتالى
