«الاتاۋ» ءداستۇرلى ونەر تەاترىندا ۇلتتىق دومبىرا كۇنىنە وراي «اتا دومبىرا» اتتى ادەبي-سازدى كەش ءوتتى (تەاتر ديرەكتورى: رينات زايتوۆ، قويۋشى-رەجيسسەر: جۇلدىزبەك جۇمانباي). جىل سايىن اتالىپ وتەتىن ۇلتىمىزدىڭ تەرەڭ تامىرلى مادەنيەتىن اسقاقتاتاتىن مەرەكەنىڭ ۇلتتىق رۋحانياتىمىزعا قوسار ۇلەسى زور.
تۇركىتانۋشى، عالىم قارجاۋباي سارتقوجا «اتا دومبىرا» اتتى ماقالاسىندا كونە دومبىرانىڭ تابىلعان ورنى جايلى بىلاي دەيدى:
«موڭعول التاي جوتاسىنىڭ ءبىر سىلەمى جارعالانت-قايىرقان تاۋى. وسى تاۋدىڭ «ءومنوحون امان» (الدىڭعى ساي) دەگەن جەرىندە ورنالاسقان نۇحەن-حاد (ۇڭگىر تاس) دەگەن ۇڭگىردەن تابىلعان.
2008 جىلى وسى جەردىڭ تۇرعىنى ن.داندار دەگەن شوپان العاش ۇڭگىرگە تاپ بولىپ، ونىڭ ىشىندە موينى قيسىق ساز اسپابى بار ەكەنىن اۋىل مەكتەبىنىڭ مۇعالىمى چ.ەنحتور دەگەن ازاماتقا حابارلايدى. مۇعالىم چ.ەنحتور ۇلان-باتىر قالاسىندا ورنالاسقان موڭعوليا رەسپۋبليكاسى عىلىم اكادەمياسىنىڭ ارحەولوگيا ينستيتۋتىنا اقپارات جەتكىزىپ، ارحەولوگتاردى شاقىرتادى».
مۇرات ابۋعازى بولسا ءوزىنىڭ «دومبىرا اسپابىنىڭ شىعۋ تەگى جايىندا» اتتى ماقالاسىندا «ەجەلگى تۇرىك داۋىرىندە دومبىرا اسپابى كەڭىنەن قولدانىسقا يە بولعاندىعىن وسى كەزەڭنىڭ جادىگەرلەرى سانالاتىن ەسكەرتكىشتەر بالبال تاستارعا، قىلىش-قانجار سىندى قارۋ-جاراقتاردىڭ سابىنا قاشالىپ سالىنعان دومبىرا اسپابىن ۇستاپ تۇرعان ادام بەينەلەرىنەن كورۋگە بولادى»، – دەيدى.
(سۋرەتتەر اشىق دەرەككوزدەردەن الىندى)
قۋانىش جۇمابەكۇلى
PhD دوكتورى،
«الاتاۋ» ءداستۇرلى ونەر تەاترى ادەبيەت ءبولىمىنىڭ باسشىسى
