ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ كوروناۆيرۋسقا قارسى ۆاكتسينا سالدىرۋدان باس تارتقانى ءۇشىن قازاقستاندىقتاردى جۇمىستان بوساتۋى نەمەسە جۇمىستان شەتتەتۋى مۇمكىن بە دەگەن سۇراققا جاۋاپ بەردى، دەپ حابارلايدى «ادىرنا» ۇلتتىق پورتالى Tengrinews.kz سايتىنا سىلتەمە جاساپ.
مينيستر «اشىق ديالوگ» eGov پورتالىندا قازاقستاندىقتاردىڭ سۇراقتارىنا جاۋاپ بەردى. ونىڭ ايتۋىنشا، «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكستىڭ 77-بابىنا سايكەس، كەز كەلگەن مەديتسينالىق ءراسىم، ونىڭ ىشىندە ۆاكتسينا دا ەكپە الۋشىنىڭ كەلىسىمى ارقىلى عانا جۇرگىزىلەدى. ۆاكتسيناتسيادان باس تارتقانى ءۇشىن اكىمشىلىك نەمەسە قىلمىستىق جاۋاپكەرشىلىك زاڭنامادا كوزدەلمەگەن.
الايدا دەنساۋلىق تۋرالى كودەكستىڭ 104-بابى 1-تارماعىنا سايكەس قازاقستان اۋماعىنا ينفەكتسيالىق جانە پارازيتتىك اۋرۋ اكەلىنۋى نەمەسە ەلدىڭ بۇكىل اۋماعىنا تارالۋ قاۋپى تونگەن جاعدايدا ەلدىڭ باس سانيتاريا دارىگەرى شەكتەۋ شارالارىن، ونىڭ ىشىندە كاسىپكەرلىك جانە وزگە دە قىزمەتكە كارانتين ەنگىزەدى.
«وسىعان بايلانىستى، قازاقستاننىڭ باس سانيتاريا دارىگەرى ءتيىستى قاۋلىلار قابىلدايدى. باس دارىگەردىڭ №67 قاۋلىسىنىڭ 6-1 تارماعىنا سايكەس:
- قاۋلىدا كورسەتىلگەن ۇيىمدار مەن نىسانداردىڭ COVID-19-عا قارسى ۆاكتسينا سالدىرماعان قىزمەتكەرلەرىن كۇندىزگى رەجيمدە جۇمىس ىستەۋىن شەكتەۋ.
- ءبىرىنشى تارماقشادا كورسەتىلگەن ۇيىمداردىڭ ۆاكتسينا الماعان قىزمەتكەرلەرى ءۇشىن مىندەتتى پتر-سىناما 7 كۇندە ءبىر رەت جۇرگىزىلەدى.
ەرەكشە جاعداي بويىنشا ۆاكتسيناتسياعا مەديتسينالىق قارسى كورسەتىلىمى بار ادامدار، سونداي-اق سوڭعى ءۇش ايدا كوروناۆيرۋس جۇقتىرىپ، اۋىرعان كىرەدى»، - دەپ ءتۇسىندىردى مينيستر.
ونىڭ ايتۋىنشا، جۇمىس بەرۋشى:
- ەگەر مۇمكىندىك بولسا، COVID-19-عا قارسى ۆاكتسيناتسيا الماعان قىزمەتكەردى قاشىقتان جۇمىس ىستەۋ فورماتىنا اۋىسۋدى ۇسىنىعا;
- قاشىقتان جۇمىس ىستەۋدەن باس تارتقان نە جۇمىستى قاشىقتان ورىنداۋ مۇمكىندىگى بولماعان كەزدە قىزمەتكەردى ەڭبەك كودەكسىنىڭ 48-بابى 1-تارماعىنا سايكەس جالاقىسىن ساقتاماي شەتتەتۋگە قۇقىلى. بۇل رەتتە جۇمىس بەرۋشى ۋاقىتشا بولماعان قىزمەتكەر مىندەتتەرىن ورىنداۋ ءۇشىن باسقا قىزمەتكەردى قابىلداۋعا قۇقىلى;
- جۇمىستى قاشىقتان ورىنداۋ مۇمكىندىگى بولماعان جاعدايدا جانە قىزمەتكەر كۇندىزگى رەجيمدە جۇمىس ىستەگىسى كەلسە، قىزمەتكەر ءوز ەسەبىنەن مىندەتتى پتر-سىناما ءوتۋى كەرەك.
مينيستر تاراپتاردىڭ كەلىسىمى بويىنشا مىندەتتى پتر-سىناما جۇمىس بەرۋشىنىڭ قاراجاتى ەسەبىنەن جۇزەگە اسىرىلۋى مۇمكىن ەكەنىن ايتتى.
«وسىلايشا، ۆاكتسيناتسيادان باس تارتۋىنا بايلانىستى جۇمىس بەرۋشىنىڭ قىزمەتكەردى جۇمىستان شىعارۋعا قۇقىعى جوق. سونىمەن قاتار، قىزمەتكەرلەر وزدەرىنىڭ ەڭبەك قۇقىقتارىن قورعاۋ ءۇشىن جۇمىس بەرۋشىنىڭ ورنالاسقان جەرى بويىنشا ءتيىستى اكىمشىلىك-اۋماقتىق بىرلىكتىڭ ەڭبەك ينسپەكتسياسى جونىندەگى باسقارماسىنا ءوتىنىش بەرۋگە قۇقىلى»، - دەپ تولىقتىردى مينيستر.
ايتا كەتەيىك، 2 شىلدەدەن باستاپ بارلىق قىزمەتكەرى ۆاكتسينا سالدىرۋى كەرەك نىسانداردىڭ كەڭەيتىلگەن ءتىزىمى كۇشىنە ەندى. تىزبەگە بازارلار، سۇلۋلىق سالوندارى، ءدامحانالار، مەيرامحانالار، قىزمەت كورسەتۋ نىساندارى جانە حالىق جاپپاي باراتىن باسقا دا ورىندار كىرگەن.
"ادىرنا" ۇلتتىق پورتالى
