سوڭعى جىلدارى ەلىمىزدىڭ كوپ وڭىرىندە تىگىن فابريكالارى اشىلىپ جاتىر. بۇل — الداعى ۋاقىتتا ءوز ءونىمىمىزدى تۇتىنامىز دەگەن ءسوز. كورشى جانە شەت ەلدەردىڭ برەندىنە "جۇگىرمەي", وتاندىق ءونىمدى ناسيحاتتايتىن ۋاقىت جەتتى.
بىلتىر "A-Textile" جشس اقتوبەدە تىگىن فابريكاسىن اشتى. كەزىندە تانىمال بولعان ۇلكەن فابريكانىڭ ءىزىن باسقان بۇل ءوندىرىس ورنىندا قازىر 60 ادام ەڭبەك ەتەدى. بيىل فابريكا جىل اياعىنا دەيىن 240 مىڭ دانا ءونىم شىعارۋدى جوسپارلاپ وتىر. قازىر مۇندا ەر جانە ايەلدەرگە ارنالعان فۋتبولكا، سپورتتىق جانە ءىش كيىمدەر، بالالارعا ارنالعان سپورتتىق كيىمدەر مەن پيجامالار تىگىلەدى.
تىگىن فابريكاسىن اشۋعا اقتوبەلىك كاسىپكەرلەر 430 ملن تەڭگە ينۆەستيتسيا سالعان.
"A-Textile" جشس-نىڭ كوممەرتسيالىق ديرەكتورى سابىرجان بالمۇرزيەۆتىڭ ايتۋىنشا، قازىرگى تاڭدا فابريكا ءبىرىنشى كەزەڭ بويىنشا قارقىندى جۇمىس جاساۋدا.
— اقتوبە تىگىن فابريكاسىن اشۋعا وسى وڭىردەگى بەلگىلى كاسىپكەرلەر اتسالىسىپ، ينۆەستيتسيا "قۇيدى". وتكەن جىلى پاندەميا كەزىندە ءبىزدىڭ جۇمىسىمىز ءبىراز تۇرىپ قالدى. قازىر مۇندا جالپى سانى 60-تان استام ادام ەڭبەك ەتىپ جاتىر. بارلىعى ءىس-تاجىريبەدەن ءوتىپ، ماماندىعى بويىنشا جۇمىسقا الىندى. الداعى ۋاقىتتا وبلىستاعى بىرقاتار كوللەدجدەر مەن قۇدايبەرگەن جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ ديزاين ماماندىعىندا وقيتىن ستۋدەنتتەر وسى جەردە پراكتيكادان وتەدى. كەيىن ولاردىڭ اراسىندا ۇزدىكتەرىن جۇمىسقا قالدىرۋ جوسپارىمىزدا بار. قازىر فابريكامىز ءبىرىنشى كەزەڭ بويىنشا جۇمىس جاساۋدا. بىلتىردان بەرى ءبىر جىل ىشىندە 120 مىڭ دانا ءونىم شىعاردىق. ونىمدەرىمىزدى وبلىستاعى ءىرى ساۋدا ورتالىقتارى، اتاپ ايتساق، "فيەستا", "برەند مافيا" سياقتى كيىم دۇكەندەرى ساتىپ الىپ جاتىر. سونداي-اق اتىراۋدان، كەنتاۋدان، اقتاۋدان، نۇر-سۇلتاننان تاپسىرىس بەرەتىندەر دە بار. جالپى وتاندىق ونىمگە سۇرانىس جوعارى. سەبەبى ساپاسى جاقسى، ال باعاسى ارزان، قاجەتتى قۇرىلعىلاردى گەرمانيا مەن وڭتۇستىك كورەيادان، ال شيكىزاتتى تۇركيا مەن وزبەكستاننان تاسىمالداپ جاتىرمىز، — دەيدى ول.
فابريكادا تىگىلگەن ونىمدەردىڭ بارلىعى ساپالى. سەبەبى وزبەكستاننان اكەلىنەتىن شيكىزات قۇرامىندا (تريكوتاج) سينتەتيكا جوق. ال باعاسى وزگە ەلدەردەن اكەلىنەتىن ونىمدەردەن ەكى ەسەگە ارزان. سوندىقتان دا بۇگىنگى كۇنى جەرگىلىكتى كاسىپكەرلەر تىگىن فابريكاسىنىڭ ونىمدەرىنە اسا قىزىعۋشىلىق تانىتۋدا.
— بيىل كۇز ايىنان باستاپ ءوندىرىستى كەڭەيتىپ، ەكىنشى كەزەڭدى باستايمىز. جىل سوڭىنا دەيىن مۇندا تاعى 90 ادامدى جۇمىسقا قابىلداپ، ءوندىرىس قۋاتىن ارتتىرۋدى جوسپارلاپ وتىرمىز. جۋىردا گەرمانيا، يتاليا جانە قىتايدان فابريكاعا قاجەتتى قۇرال-جابدىقتار كەلەدى. ولاردىڭ جالپى قۇنى — 250 مىڭ دوللار شاماسىندا. جاڭا قۇرىلعىلار ىسكە قوسىلعان سوڭ فابريكامىز جىلىنا ەڭ كەمىندە 240 مىڭ دانا ءونىم شىعاراتىن بولادى. ماسەلەن، سوڭعى ۇلگىدەگى اۆتوماتتى تۇردە ارنايى باعدارلاماعا ەنگىزىلگەن ونەركاسىپتىك پرينتەر (پلوتتەر) تىگىنشىلەردىڭ جۇمىسىن جەڭىلدەتەدى. قۇرىلعى سىزباۇلگىلەردى وزدىگىنەن ماتا ۇستىنە قويىپ، سىزىپ، ءپىشىپ بەرەتىن بولادى. وسىلايشا قازىرگى جۇمىسىمىز ەكى ەسەگە ازايىپ، ەسەسىنە ءونىم سانى ارتادى. سونداي-اق كۇزدەن باستاپ ەر جانە ايەلدەرگە ارنالعان كۇرتەشە، پلاشش، جەلبەگەي، شولاق جەڭدى كيىمدەر تىگۋدى باستايمىز. ول ءۇشىن شيكىزاتتى تۇركيادان اكەلۋدى جوسپارلاپ وتىرمىز، — دەيدى سابىرجان بالمۇرزيەۆ.
"A-Textile" جشس قازىرگى تسەح عيماراتىن جالعا الىپ وتىر. الداعى ۋاقىتتا ءوندىرىس ورنىنىڭ قۋاتى ارتسا، فابريكاعا بۇدان دا ۇلكەن عيمارات كەرەك. سەرىكتەستىك باسشىلىعى مەملەكەت تاراپىنان جەر بەرىلسە دەگەن تىلەگىن ايتتى.
— ءبىزدىڭ ماقسات — ءوندىرىسىمىزدى جىلدان جىلعا دامىتىپ، ىشكى نارىقتى تولىقتىرىپ بارىپ، اقتوبەلىك برەند ۇلگىسىندەگى دايىن ونىمدەردى الىس-جاقىن شەتەلدەرگە ساتۋ, جارنامالاۋ. ماسەلەن، قىرعىزستان سياقتى ءبىز دە نەگە وتاندىق ونىمدەرىمىزدى وزگە ەلدەرگە ەكسپورتتاماسقا؟ بۇل جەردە ءبىر عانا ماسەلە بار. ول — شيكىزات ماسەلەسى. قازىر ءبىز دايىن شيكىزاتتى وزبەكستاننان اكەلىپ وتىرمىز. رەسپۋبليكامىزدا ماتا، ءجىپ وندىرەتىن كاسىپورىندار جوقتىڭ قاسى, — دەيدى س.بالمۇرزيەۆ.
ال فابريكانىڭ ءوندىرىس تسەحىنىڭ جەتەكشىسى سۆەتلانا ايباتوۆانىڭ ايتۋىنشا، قازىرگى وتاندىق ونىمدەر شەتەلدەن كەلگەن ونىمدەردەن الدەقايدا ارزان، ءارى ساپالى.
— ءبىزدىڭ قازىرگى بالالارعا تىگىپ جاتقان كيىمدەرىمىزدىڭ بارلىعى — ماقتادان تىگىلگەن ونىمدەر. قۇرامىندا 5-7 پايىز عانا سينتەتيكا بار. باعاسى وزگە ەلدەردەن كەلەتىن ونىمدەردەن ەكى ەسەگە ارزان. ماسەلەن، جۇرت ماقتايتىن تۇركيالىق ونىمدەردىڭ ساپاسى بىزبەن بىردەي. كوپشىلىك ولاردى برەند بولعانى ءۇشىن تاڭدايدى. الداعى ۋاقىتتا ءبىز دە وندىرىسىمىزدە زامان تالابىنا ساي برەند ۇلگىسىن قالىپتاستىرساق، حالىق ەش ويلانباستان ساتىپ الاتىن بولادى, — دەيدى ول.
بۇگىندە فابريكا جۇمىسشىلارىنىڭ ورتاشا جالاقىسى — 100 مىڭ تەڭگە. مۇندا تاجىريبەلى ماماندار دا، جاستار دا بار. ولار اقتوبەنىڭ برەندىن قالىپتاستىرۋ جولىندا قازىر ۇزدىكسىز ەڭبەك ەتۋدە.
داناگۇل بايمۇقاش،
"ادىرنا" ۇلتتىق پورتالى.
