كوروناۆيرۋستىڭ تاعى ءبىر قاۋىپتى اسەرى انىقتالدى

4421
Adyrna.kz Telegram

كوروناۆيرۋس ادام اعزاسىنا تۇسكەننەن كەيىن ەرتە قارتايۋ پروتسەسىن جىلدامداتادى. بۇل تۋرالى رەسەيلىك نەۆرولوگ ەركىن شامسيەۆ ايتتى، دەپ حابارلايدى «ادىرنا» ۇلتتىق پورتالى Stan.kz اقپارات اگەنتتىگىنە سىلتەمە جاساپ.

«وكىنىشكە قاراي، كوروناۆيرۋس ينفەكتسياسى ادام اعزاسىنا تۇسكەندە وكپە ترومبوزىنان بولەك باسقا دا جاعىمسىز پروتسەستەردى قوزدىرا الادى. ماسەلەن، ەرتە قارتايۋ بار. سەبەبى اۋرۋعا شالدىققان ادام قاتتى كۇيزەلىسكە تۇسەدى. قورقىنىش پەن فوبيا پايدا بولادى. ادام مورالدى تۇرعىدا قاتتى شارشايدى. وعان قوسا، ۆيرۋستىڭ ادام اعزاسىنا تيگىزەتىن تابيعي اسەرى بار»، - دەيدى شامسيەۆ.

ونىڭ ايتۋىنشا، وكپە زاقىمدانعاندا ادام اعزاسىندا گاز الماسۋ پروتسەسى بۇزىلادى. سودان ميعا وتتەگى دۇرىس بارمايدى. ال كوروناۆيرۋسپەن اۋىرىپ شىققان ادامدار ەنتسەفالوپاتياعا ءجيى شاعىمدانادى. وندايدا ديستوفيانىڭ سالدارىنان ميدىڭ ءتىنى وزگەرەدى. سودان ميدىڭ جۇمىسى بۇزىلادى.

«مىسالى كوۆيد ورتالىقتارىنا تۇسەتىن ناۋقاستاردىڭ كوبىسى باسى اۋىرىپ، جوتەل قىساتىنىن، ءيىس سەزبەي قالاتىنىن ايتادى. ال ءيىس سەزۋ قابىلەتى نەگە جوعالادى؟ سەبەبى وعان ءبىرىنشى باس-مي جۇيكەسى جاۋاپ بەرەدى. ول ميدا ورنالاسقان»، - دەپ اتاپ ءوتتى رەسەيلىك نەۆروپاتولوگ.

كوروناۆيرۋستان كەيىن ەرتە قارتايۋ پروتسەسىن توقتاتۋعا بولادى. ول ءۇشىن ءومىر ءسۇرۋ ساپاسىن بارىنشا جاقسارتۋ قاجەت. سپورتپەن اينالىسىپ، دۇرىس تاماقتانعان ءجون. جۇيكە جۇيەسىنە دە كوپ سالماق تۇسىرمەۋ كەرەك.

«جۇزۋمەن، سپورتپەن، فيتنەسپەن اينالىسۋ قاجەت. سوسىن دۇرىس تاماقتانىپ، ارتىق سالماقتان قۇتىلعان ءجون. تازا اۋادا جۇرگەن پايدالى. تەمەكى مەن الكوگولدەن باس تارتقانىڭىز دۇرىس. ال اۆيتامينوز بولسا، كوكونىس پەن جەمىستەردى كوپ جەۋ كەرەك. ادام ءوز كۇشىمەن يممۋنيتەتتى قالپىنا كەلتىرۋگە ءتيىس. سوندا ەرتە قارتايۋعا اپاراتىن پروتسەستى توقتاتۋعا بولادى»، - دەيدى شامسيەۆ.

"ادىرنا" ۇلتتىق پورتالى

پىكىرلەر