باۋىرجان سەرىكباەۆ: كارانتين مەن كىشكەنتاي عانا ۆيرۋس تالاي جىرتىعىمىزدى اشىپ بەردى

2797
Adyrna.kz Telegram

قيىن كەزەڭدەر ءبىراز جىرتىعىمىزدى اشىپ بەردى. نەگىزى بۇرىننان بىلەتىن دۇنيەلەر عوي. بىراق قازىر كوزىمىزگە شۇقىپ، قولىمىزعا ۇستاتىپ كورسەتىپ بەردى.

1. "تسيفرلى قازاقستان" دەپ ميللياردتاعان تەڭگە ءبولىندى. ناتيجەسى ۇياتقا قالدىردى.

2. "يندۋستريالدى-يننوۆاتسيالىق دامۋ" دەپ ءبىراز شۋلادىق. مۇناي 20 دوللارعا جەتكەندە ەكونوميكانىڭ جاعدايى بەلگىلى بولدى.

3. لەنتاسى كەسىلىپ زاۆود، فابريكا اشتىق. بىراق ەكونوميكانىڭ وسۋىنە ىقپالى بولمادى. كوبىسى جابىلىپ تىندى.

4. ەكسپو دەپ جوبامەن 3 ملرد دوللار جۇمسادىق. سولتۇستىك ءوڭىرىمىز ءالى كۇنگە 6 اي قىستا كومىر جاعۋمەن كەلەدى.

5. بانك سەكتورى ءار كريزيس سايىن مەملەكەتتەن كومەك الۋدان باسقانى بىلمەدى.

6. 30 جىلدا ناقتى ءونىم وندىرەتىن مەملەكەت بولا المادىق.

7. جەمقورلىق بالاباقشادان باستالىپ، ۇلكەن قىمەتكە دەيىن شارىقتاپ كەتتى.

8. ساۋاتتى، باسەكەلى ساياسي جۇيە ورناتا المادىق. ەسى دۇرىس وپپوزيتسيا دا جوق. كىمگە سەنەرىن بىلمەي دال بولعان قوعامىمىز بار.

9. سەنىم كرەديتى تومەندەپ بارادى. كۇردەلى ەكونوميكالىق شەشىمدەر جاساۋعا قوعامنىڭ كوڭىل-كۇيى كوتەرمەيدى.

10. 30 جىل ءانشى، ءبيشى، سپورتشىلاردان جۇلدىز جاسادىق. تەلەارنانى كۇلكى مەن ارزان ويىن-ساۋىق قاپتادى. ناتيجەسىندە بۇگىنگى قوعامدىق دەڭگەيدى الدىق.

قازاقستاندا ءتيىمدى جۇمىس ىستەپ تۇرعان، ءوز باسىم قىزمەتىنە كوڭىلىم تولاتىن "Kaspi Gold" قانا. مۇنى دا كوپ كورىپ تالقانداپ تىنباسا ەكەن.

نەگىزى كارانتين مەن كىشكەنتاي عانا ۆيرۋس تالاي جىرتىعىمىزدى اشىپ بەردى. ەندى بۇرىنعى جولعا ەشكىمنىڭ تۇسكىسى كەلمەيدى. سانادا توڭكەرىس ءجۇرىپ جاتىر. وزگەرىس پەن دامۋ قاجەت. تولقىننان تولقىن تۋىپ، الدىڭعى تولقىندى ىعىستىرار كەز دە كەلدى. ءبىر وزگەرىستىڭ كەرەگى انىق. پرەزيدەنتكە قۇداي قۋات بەرسىن. قۇدايدىڭ ءبىر اتى حالىق دەگەن. حالىقتىڭ قولداۋىن بەرسىن. التەرناتيۆا جوق. تالاي جىلعى دۇنيەنى تازالاۋ، كەرى ناتيجەسى جان-جاقتان اتقىلاپ كورىنە باستاعان زاماندا بيلىككە كەلۋ وڭاي ەمەس. قيىن شارۋا ءبىر باسىندا.

باۋىرجان سەرىكباەۆ

پىكىرلەر