ەلىمىزدىڭ بەلگىلى پروفەسسورى قايتىس بولدى

6262
Adyrna.kz Telegram

23 شىلدە كۇنى ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا جانە ساياساتتانۋ فاكۋلتەتى ءدىنتانۋ جانە مادەنيەتتانۋ كافەدراسىنىڭ پروفەسسورى، فيلوسوفيا عىلىمىنىڭ دوكتورى، كورنەكتى عالىم، ۇلاعاتتى ۇستاز رىسبەكوۆا ءشامشيا سايدعاليقىزى باقيلىق بولدى.

رىسبەكوۆا ءشامشيا سايدعاليقىزى ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا جانە ساياساتتانۋ فاكۋلتەتىنىڭ تۇلەگى. 1993 جىلى قازاق فيلوسوفياسىنىڭ تاريحى بولىمىندە كىشى عىلىمي قىزمەتكەرى بولىپ، عىلىمداعى ەڭبەك جولىن باستادى، فيلوسوفيا جانە ساياساتتانۋ ينستيتۋتىنىڭ اسپيرانتۋراسىندا وقىپ، عىلىمي زەرتتەۋلەرىن جالعاستىردى. اسپيرانتۋرانى اياقتاعان سوڭ باسقارۋ جانە ەكونوميكا اكادەمياسىندا «فيلوسوفيا جانە تىلدەر» كافەدراسىنىڭ «فيلوسوفيا» ءبولىمىنىڭ مەڭگەرۋشىسى قىزمەتىن اتقاردى. فيلوسوفيا عىلىمى سالاسىنان «اباي فيلوسوفياسىنداعى ادامنىڭ ءمانى مەن ماقساتى» تاقىرىبىندا كانديداتتىق، «قازىرگى ءدىني فيلوسوفياداعى انتروپولوگيالىق ديسكۋرس» تاقىرىبىندا دوكتورلىق ديسسەرتاتسيا جۇمىسىن تابىستى قورعادى. 2003 جىلدان باستاپ قايتىس بولعانعا دەيىن ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا جانە عىلىم ءادىسناماسى كافەدراسىندا (كەيىننەن ءدىنتانۋ جانە مادەنيەتتانۋ كافەدراسى) جۇمىس ىستەدى.

رىسبەكوۆا ءشامشيا سايدعاليقىزى 100-دەن استام عىلىمي ەڭبەكتىڭ، 3 مونوگرافيا جانە 15 وقۋ قۇرالىنىڭ اۆتورى. اۆتوردىڭ حالىقارالىق رەيتينگىسى جوعارى عىلىمي جۋرنالداردا (Web of Science, Thomson Reuters) 15-كە جۋىق عىلىمي ماقالاسى جاريالانعان. سونىمەن بىرگە وتاندىق جانە شەتەلدىك عالىمداردىڭ نازارىن وزىنە اۋدارتقان «زاماناۋي قازاقستاننىڭ ساياسي پروتسەسى كونتەكسىندەگى يسلام» (پاريج، 2012 ج.), «XIX عاسىر مەن XX عاسىردىڭ باسىندا ءومىر سۇرگەن قازاق ويشىلدارىنىڭ ادام بولمىسىن بايىپتاۋ تۇرعىسىنداعى مۇراسى مەن ميراسى» (2016 ج.), «كونفەسسيالاردىڭ قاۋىپسىزدىگى مەملەكەتتىك-كونفەسسيالىق ساياساتتىڭ نەگىزگى مىندەتى» (2016 ج.), «ويۋ-ورنەك ەتنوستاردىڭ بەيۆەربالدى كوممۋنيكاتسياسىنىڭ ايرىقشا بەلگىسى» (2016 ج.), «ريتۋال جانە ءدىني بىرەگەيلىكتى كونسترۋكتسيالاۋ» (2016 ج.), «قازاق اعارتۋشىلارىنىڭ پاتشا وكىمەتىنىڭ ءدىني ەكسپانياسىنا قارسى كۇرەسى» (2015 ج.), «Contours of attitude of adolescents towards religion and religions identification in Kazakhstan» (2016 ج.), «Politikal aspects of a missionary aktimty of neoprotestant organizations» (2016 ج.), «Tolerance issue in Kazakh سulture» (2016 ج.), «Cemiotik Analysis of the Yurt, Clothing, and Food Eating Habits in Kazakh Traditional Cultures» (2016 ج.) تاقىرىبىنداعى مازمۇندى زەرتتەۋلەرى جارىق كوردى. بىلىكتى عالىم سونداي-اق ىرگەلى گرانتتىق جوبالار اياسىندا بىرنەشە عىلىمي زەرتتەۋمەن اينالىسىپ، وتاندىق گۋمانيتارلىق عىلىم سالاسىنا قوماقتى ۇلەس قوستى.

ءشامشيا سايدعاليقىزى گۋمانيتارلىق عىلىم جولىنداعى تۇعىرلى ىزدەنىستەرى، بولمىسى بولەك ۇستازدىق كەلبەتىمەن فاكۋلتەت پەن كافەدرانىڭ پروفەسسور-وقىتۋشىلارى مەن شاكىرتتەرى اراسىندا بەدەلدى، سىيلى عالىم-ۇستازداردىڭ ءبىرى بولدى. ادامشىلىق قاسيەتى، عالىمدىق تۇلعاسىمەن، مازمۇندى، قىزىقتى دارىستەرىمەن شاكىرتتەرىنىڭ جان دۇنيەسىن باۋراپ الاتىن عالىمنىڭ جارقىن بەينەسى ەشقاشان ۇمىتىلمايدى.

ءال-فارابي اتىنداعى قازاق ۇلتتىق ۋنيۆەرسيتەتى فيلوسوفيا جانە ساياساتتانۋ فاكۋلتەتىنىڭ ۇجىمى رىسبەكوۆا ءشامشيا سايدعاليقىزىنىڭ ورنى تولماس قازاسىنا بايلانىستى مارقۇمنىڭ وتباسى مەن تۋىستارىنا قايعىرىپ، كوڭىل ايتادى.

پىكىرلەر